九龍城魚一料理

        憲兒與朋友們去海洋公園玩並直落一齊吃晚飯, 故此只有我與老公撐枱腳。我倆到九龍城購物, 並到處逛街看看晚餐吃什麼。老公想食日本嘢, 我無所謂, 只是不想吃太多魚生, 想吃熟食, 結果選擇了魚一料理。
        我要了一個銀鱈魚定食 $118 , 老公要了一個豚肉定食 $88 , 不收加一服務費, 明碼實價, 價格合理, 不會偏貴。食物質素方面, 簡直有驚喜, 它不似一般的行貨, 食物配搭很有心思, 竟然有魚生沙律、銀魚乾、水果是青提。味增湯十分好味, 不似一般鹹到死, 好好飲 ! 主菜的銀鱈魚好味, 老公嘅豚肉都好好味, 我們對這一餐飯都十分滿意, 下次帶寶貝來試試。

板長外賣壽司

       今天老公話唔想食飯, 想食壽司。於是中午時一家人到板長揀壽司兼付款, 然後安排在晚上 6:30 送抵家中。點呀點呀, 埋單 $430 , 覺得 order 了很多東西, 怎料收貨時, 感覺好像不夠吃似的 , 我覺得唔抵食囉 ! 

九龍貝爾特酒店海鮮自助晚餐

        數星期前, 老公見到團購有九龍貝爾特酒店海鮮自助晚餐, 超抵 ! 星期五六日的晚餐只需 $288 + $41.8﹝加一費﹞, 即 $330 , 真係好抵, 馬上訂了 8 位。如果是平日的話, 只需 $283 而已。

        酒店位置在新蒲崗六合街, 即是工廠區, 但勝在都是位處於市區, 有很多巴士可以到達 , 交通完全無問題。

        酒店的設計令人驚喜, 與平時見慣見熟的酒店模式有所不同, 雖然不是行 grand 的路線, 帶點懷舊型格及設計時尚的味道, 十分不錯, 還有桌球枱及遊戲耍樂設施, 以供食客享用 。

        食物的選擇甚多, 雖然不是貴價食材, 但刺身、即開生蠔、鱈場蟹腳、青口、蝦、翡翠螺都有供應。熱葷的選擇也十分多, 有點喜出望外, 味道方面也不俗的, 以此價格有此等質素, 是絕對抵食的。

又一城八月花

        一家三口行又一城, 晚餐吃什麼好呢? 見到八月花很多人在門口等位, 相信應該不錯, 決定馬上取電腦票等位。怎料要等很久的, 哎呀, 足足等了 40 分鐘, 餓死人啦 ! 終於有得食, 好好味 , 不枉等了這麼久 。眾多個餸中, 我覺得較差的是龍蝦伊麵呀 ! 其餘每個餸都好味 ! 

他的一句話

      與好友閒聊中, 問及我的老公為什麼會買錶送給我呢? 其實我都唔知, 我還說可能是我倆註冊 N 週年吧 ! 待老公吃飽飯, 坐低休息之際, 我問他點解會送隻錶給我呢? 老公話 " 你話要嘛, 咪買俾你囉 ! " 我呆了兩秒, 好感動呀 ! 這個傻瓜從來都不懂得哄我的, 他一點都無修飾便回答我, 答得好真呀 ! 我好開心 ! 

如心艾朗酒店半自助餐

        憲兒想食自助餐, 在團購中睇中如心艾朗酒店的半自助餐, 於是買了三位。為了要遷就老公及憲兒的檔期, 買了後者的團購。

星期一至四, 自助晚餐價格為 $298 + $49.8 ( 正價加一費 ) 

星期五至日, 自助晚餐價格為 $348 + $53.8 ( 正價加一費 ) 

        今天抵步酒店後, 竟然見到久違了的外國人足跡, 不是強國人, 真是有點喜出望外, 最令我驚訝的是酒店身處觀塘, 這裡不是尖沙咀, 也有外國人, 真難得。

         入座不久, 侍應奉上一部 ipad 給我們各自點主菜, 我選擇了魚, 老公選擇了海鮮, 憲兒選了豬肋骨。我的選擇是最精明, 因為魚是最好吃的。這裡的食物款式不算是十分多, 但食物是有質素, 重質不重量, 不錯 ! 最令我驚喜是竟然供應 movenpick 雪糕, 平時去吃自助餐大多是 haagen dazs 雪糕, 最衰的便是雀巢雪糕, 今次有 movenpick 雪糕吃, 超級開心 ! 這雪糕實在是太好味啦, 冒着血糖會高升的風險, 都要食兩球。 

        實在是吃得太飽了, 一家三口, 決定由觀塘行去九龍灣德福。憲兒嚷着要坐的士回家, 因為他飽到想嘔, 老公與我強烈命令他一定要行, 坐入的士分分鐘嘔出來。我們一邊行, 我拿了藥油替他搽一搽, 行了十分鐘後, 他覺得個人無咁辛苦啦 ! 衰豬, 搏晒老命, 食到咁盡, 俾佢激死。

        到了德福商場, 老公買了一隻粉紅色的鐵達時陶瓷錶身的手錶給我, 好開心, 好開心呀 ! 

      

豐富早餐

        兩個大飽內有芝士、蛋、豬柳扒、芝麻醬, 這就是憲兒一個人的早餐, 怎可能吃得下??? 我一時偷懶, 叫他自己煮早餐, 他竟然煮咁多, 真係俾佢激死, 如何減肥呢? 天方夜譚! 他吃了早餐後, 我問他飽唔飽, 他說今次真係好飽。我真的擔心他的胃及腸, 太辛苦了, 又要加班工作。