女侍應/收銀態度惡劣

    

     一家三口前來麵麵棧光顧, 因為這家的南乳豬手及水餃都不錯的, 我們點了淨豬手、水餃麵、牛腩撈麵、牛筋撈麵、手打肉丸粥、甜蟹粥、灼介蘭及一支樽裝可樂。我覺得三個人吃這麼多的食物, 絕不算是低消費者啦! 
       ORDER 了食物後, 叫了一位女侍應, 請她給我們幾杯水, 可能她忘了, 食物全都奉上枱後, 仍未有水來。故此我叫了另一位女侍應 ( 她也負責收銀的, 有理由相信她可能是老闆娘或老闆的親戚 ) , 「唔該俾三杯水」, 這女子跟我說現在無茶水供應, 但我見到牆上貼着一張紙, 紙上寫着 " 現在本店不再供應茶水, 如有需要請通知職員" , 我現在有需要並已通知職員啦 ! 你真係估佢唔到, 這女子走開, 取了一杯水放在枱上, 並大聲的說:『 你哋三個人, 我最多俾你一杯水啫 !』然後走開了。  
       老公真係嬲得好緊要, 如果唔係已經食梗嘢, 真係想拍枱走人。講到好似我吔乞佢杯水咁樣, 我哋係有叫嘢食, 唔係白坐叫水飲, 點會咁樣做生意? 此女子正正是替我們落單的, 叫了咁多嘢食, 佢絕對最清楚, 竟然咁樣對客人, 乜嘢人嚟嫁 ? 咁鍾意趕客 ? 
      我與憲兒都勸着老公, 不要跟她嘈, 她用這樣的態度對待客人, 遲早會撞板的。需知道不是每個人都可以飲汽水, 唔係唔幫襯, 係唔飲得, 她有無想過糖尿病/血糖偏高的人士、老人及追求健康飲食的人, 都不可以飲汽水呢?
      隔了十分鐘, 有一對男女入來光顧, 坐在我們前一張枱, 他們也要水, 另一個女侍應都遞上了兩杯水。老公馬上說, 等陣埋單時, 一定話果個女人 。真係冤家路窄, 正正是那個女人收銀, 老公當然俾說話佢聽啦 ! 『乜你哋咁樣做生意咩? 我哋唔係無幫襯入嚟問你攞水飲, 我哋係有幫襯而且仲係你落單, 你點可以用啲咁差嘅態度對客? (老公學佢語調講 ) 你哋三個人, 我最多俾你一杯水啫 ! 你睇個枱兩個人都有兩杯水啦 ! 』女人一句聲都無出, 不過將找贖的散紙拍在枱上, 老公都費事同佢嘈。
     老公話講完之後, 條氣順很多。其實我覺得好失望, 這家的食物水準是不差的, 點解要做到自己間鋪咁衰。翻查 OPENRICE 此店的紀錄, 原來以前曾經都有人鬧佢哋啲態度差的。