中國轉捩點

中國幾時爆煲呢個問題之所以引人入勝，係因為一個連街邊買隻咸蛋都可以假嘅國家，竟然有經濟學家跳出嚟同你講今後15年中國GDP平均增長8%。

講呢樣嘢前，讓我哋重溫舊年兩單好誇張但被低調處理嘅新聞。

一單係新疆建設兵團走去買起烏克蘭5%領土，另一單係中國承諾對烏克蘭提供核保護。第一單官方已經否認，但我哋嘅疑問係如果背後冇大deal，點解中國會拎番94年嘅聲明出嚟並用到核保護？

要明白呢單大deal要先明白我哋嘅世界有三大黑土區，用嚟種野特別爽，一個係美國密西西比河沿岸，一個係中國黑龍江一帶，重有一個就係烏克蘭平原。你可能會有疑問，中國係一個全世界國土面積排第三嘅國家，一個農民同土地特別多嘅國家，因乜要去買起人哋300萬公頃土地嚟耕田？

中國GDP嘅組成，已持續多年投資佔GDP50%。GDP有幾個睇法，最原始係睇C+I+G+(X-M)，I即係投資。如果中國要維持GDP唔畀跌，而其他構成部份唔係一時三刻可以拉起，換句話要繼續起公路、起高鐵同炒樓。咁搞法，唔怪得要去人哋到買田。GDP另一個睇法係從貨幣角度去睇，好多人都話人民幣印得太多，最近人民幣又回軟，人民幣應該點睇？下期待續。

人民幣長期單邊升，好多香港人都將部分儲蓄轉成人民幣，最近回軟多波幅，相信最多人關心人民幣走勢會點。

估人民幣點走要先解決係咪濫發嘅問題。上一篇提過可用貨幣角度睇GDP，亦即MV=PT=GDP。2013年中國GDP增長7.7%，56.8萬億人民幣；M2增長13.6%，110.6萬億人民幣。

條數係咁計，M係貨幣，V係貨幣流速，PT係總價，中國官方冇公佈貨幣流速，但從上述數字可以計到中國嘅V大概係0.5~0.6。貨幣流速嘅意思就係錢嘅轉手速度，如果d錢轉手速度好快，即經濟活動頻繁，咁經濟通常好。呢類公式唔係科學，明個原理就可以。

美國嘅貨流速破緊底，但都有1.5~1.6上下，相比下中國貨幣流速太低，係中國要印特別多錢嘅真正原因。讀銀行制度比較知道英國最領先，美國落後英國3~5年，日本落後美國5~10年，中國落後幾多？唔知，如有讀者知不妨指教。中國嘅銀行制度同金融系統落後太多，但過去三十年經濟爆上，融資渠道太少，所以集中晒係銀行借貸上。當然另一個原因係有中國特色嘅樓市問題，呢部分稍後再講。

拎住張廿蚊去斬廿蚊叉燒，叉燒佬又去買廿蚊菜心，賣菜婆入士多買廿蚊餅乾，張廿蚊已轉咗三次手。如果經濟活動減低，錢嘅轉手次數少咗，GDP自然就跌。V通常被當作常數，因為變化唔會太大，咁就產生一個問題，如果GDP要保持7%，即係M2要年年13%增長，係咁印錢人民幣重有冇得升？

待續

前兩篇以經濟角度睇人民幣，但人民幣重有冇得升，卻係政治多於經濟。

中國嘅經濟事實上已經被地產騎劫咗，今年第一季內地地方收入55.4%係靠賣地。有中國特色嘅樓市係咁樣，地方政府煲起地價，發達；發展商將土地抵押畀銀行並煲起樓價，發達；銀行貸款，無端端就創造出貨幣。邊個買？一般平民接唔到幾多，當然要靠富豪權貴。

幾十年前從朋友口中聽到一個故事，話說朋友嘅朋友去內地傾野，當時內地重好荒蕪，但奇怪地方官辦公室旁邊有間士多，而間士多竟然賣Extra。朋友嘅朋友心諗買份見面禮啦，叫老細就整支Extra，點知拎出黎個盒殘到爆，佢咪叫老細換第支，但老細話呢到係得一支。後來有個地膽解釋，如果你以為支酒係拎黎飲就傻仔，支酒賣四千，送完禮呀邊個拎番落黎退三千九，所以成間鋪只需要一支酒。

呢個故事同本人完全冇關，卻令我明白有d野只係載體，懶認真去研究佢嘅價值你就傻。中國樓，就係一個載體。佢嘅作用唔係畀你住，而係畀某d人士用黎泊車。但我地都知中國係幾%人揸九十幾%財富，呢幾%人任佢點食都食唔到110萬億，所以中國嘅貨幣流速係被鎖起而特別低。如果中國樓繼續鎖起d錢，政府又要維持GDP而谷M2以13%速度增長，人民幣就會貶值，但共產黨唔想人民幣大跌，於是諗左條新橋出黎。

待續

大陸今次打貪同過去唔同，因為今次多一層經濟含意。

乾隆死後嘉慶將和珅抄家，呢個十八世紀嘅首富，一生人刮咗白銀十一億兩。十一億兩係咩概念？當時清朝一年稅收七千萬兩，抄和珅一次家夠清朝用十五年。

前兩篇提到，內地因為有中國特色嘅樓市問題同金融制度落後令貨幣流速太低，於是要靠谷M2去頂住GDP。但無止境搞基建、起高鐵、玩借貸去谷M2，人民幣遲早變陰司紙。所以今次打貪，實際上係一次釋放貨幣嘅行動。

但我地亦知道內地向來奉行讓領導先走，一旦打貪就會出現非洲草原畜牲大遷徙嘅景象，貪官會一面同人講包容一面將老婆仔女身家財產全部送出國。剛過去嘅4月，人民銀行公佈人民幣存款減少6546億，其中住戶存款減少1.23萬億。存款離開銀行，有部分係轉去買理財產品，有部分當然係著草。係咁樣嘅情況下，共產黨當然要人民幣跌，人民幣跌，貪官著草都要蝕住走。所以從另一角度睇，人民幣何時回升，就係今次打貪行動何時結束。

打貪嘅時候內地樓市出貨壓力特別大，所以黎緊要留意內地樓市係咪真跌。當經濟下行時一係資產價跌，一係匯價跌，經歷過97嘅香港人特別明白。大陸會揀邊樣？如無估錯，今次最終係要保匯價，因為共產黨想食另一樣大茶飯。

待續

人工6000蚊每年以8%複利率增長，十年後變12954蚊，多咗一倍。6000變12000容易，60萬億變120萬億難，因為基數唔同。1995年中國GDP 6萬億(人民幣，下同)，而家近60萬億，如果中國GDP要繼續以8%增長，睇黎未來要去火星起高鐵先掂。

GDP呢類指標只係數字遊戲，何苦中國必要保7保8？因為中國六四後實際上行一套上壓右疏政策，政治上一切打壓，但人需要宣洩渠道，所以要右疏，即引導全國上下所有精力都只為搵錢。久而久之，社會上不公義之事冇人敢再講，但敲詐扶呀婆者係商機，整粒膠鹹蛋係商機，煉油由南海煉到樓下個坑渠係商機，真係商機處處，唔怪得官員成日叫人把握機遇。

戰國時期魏國李悝落咗道命令，凡有官司解決唔到用射箭了斷，判中的者勝，結果秦國入侵魏國時被射到走夾唔抖。在上者嘅引導一旦積習成形，影響會好大。今時今日中國凡事以錢了斷，有人被車撞扮睇唔到，因出聲成本太高；奶粉溝三聚氰胺詐唔知，因要搵錢。忍氣吞聲可換取更好嘅物質生活，但如果同你講，中國經濟唔再一支箭咁上，廿五年噤若寒蟬嘅積壓會如何爆發？呢個先係中國GDP唔可以跌嘅真正原因。《中國轉捩點》描述一個框架，此框架如何影響股樓匯債，容後分述。

Mr. Tregunter
註：作者為《地利根德閣》blogger，著作有《樓市撈底攻略》