坤記手打竹昇麵

在新年前在 HKTVMALL 買了坤記手打竹昇麵 $139 來做新年手信送長輩, 自己也買了一盒來試試。內有三個粗麵 + 三個幼麵 + XO 醬 + 大地魚粉 + 蝦籽粉。兩天前早上我還在睡覺, 媽咪致電來問我啲麵點樣整, 我話盒內有紙教點煮的。媽咪話佢跟足來煮, 難食到死, 無味無道。於是我買了雲吞、菜、鯪魚肉、黑木耳絲及粟米粒, 晚上我用這些材料來煮麵, 並加上大地魚粉及蝦籽粉, 當我食麵時, 嘩 ! 啲麵真係好難食, 無味道, 真係好為難的完成一個麵。

點算好呢? 家中還有四個麵, 如何解決呢? 終於俾我諗到, 今天晚上買蕃茄+鮮蝦做湯底再煮麵, 由於是濃湯底, 味道好多了, 不會覺得難吃。不過, 下次不會再買這麵了。

雞年年初一晚飯

中午到長輩家拜完年後, 大夥兒上了我家, 晚上開大食會。往年會買盆菜來吃, 但真係好唔掂。上年買太興都要九百多元, 但都唔好食, 嚇怕了, 因此不買盆菜, 買一些大家喜歡吃的東西會更好 。我們還買了一盒(2.2kg)澳洲塔斯曼尼亞的車厘子$498, 做飯後水果, 大家都吃得很盡興。

自己蒸大連急凍鮑魚, 但醃味唔得, 有很大的改善空間

大家樂"風生水起好運來" $388 , 好味道 

    大家樂"紅燒瑤柱海皇仿翅" $278 , 好好味呀 ! 

超好味的南乳豬手

超級好味的滷水乳鴿

美心"乾燒伊麵" $110 , 味道麻麻地

  

兩個人的中秋節晚餐

寶貝去了匈牙利, 只有我與老公在家過中秋, 買了喜愛的食物來過節。點解會買咁多罐頭? 因為我們想買這些罐頭給寶貝, 故此我倆先試試味道, 看看是否值得買給寶貝吃。結果是買了兩罐佛跳牆及四罐花蛤, 我想寶貝收到時一定會很開心。

 外賣豬手 + 超級好味的皇帝蟹柳

FOODWISE 買的佛跳牆罐頭

FOODWISE 買的大連鮑魚, 自己蒸, 好味道 ! 

FOODWISE 買的天龍紅燒花蛤皇

滷水牛展

       數星期前買了一條急凍牛展, 今天心血來潮, 想試吓煮滷水牛展, 今次是第一次煮的。首先要上網研究食譜, 經過一輪嚴格篩選後, 終於選定了參考食譜, 然後到街市買配料。我是用真空煲煮的, 結果是唔硬, 好味道, 不過淡少少。其實我是不吃牛的, 我是煮俾老公及囝囝食, 今次成績不錯, 好嘢 ! 

黑樅茸

        今天在街市見到新東西 - 黑樅茸, 似一枝黑色粗釘般, 老闆介紹此菇是很有營養的, 每包約二十條左右, 我沒有仔細數的, 靠估, 每包是 $15, 其實相比其他菇類是有點貴的。

         今晚這碟餸有黑樅茸、青椒絲、金菇、台灣仿鮑片、雞絲及甘筍粒, 材料十足, 味道一流, 一家三口吃清光, 食量驚人。 黑樅茸的口感不錯, 很有咬口, 本身是無什麼味道的。如果日後再見到它, 我都會再買的。

炆魚唇冬菇魚蛋雞腳

         家中有一盒已浸發的魚唇在 FOODWISE 買的, 已買了很久, 心血來潮想吃魚唇, 便要的起心肝自己煮。家中有九記魚蛋是在團購買的, 我覺得肉質太實, 心想不如炆啦! 家中有一口冬菇, 馬上浸菇。只有三樣好似太少, 突然想起雞腳, 於是便到街市買。這個餸是我第一次弄的, 結果是超乎預期的好吃, 我話嘅 ! 囝囝話好食, 老公話無味, 我真係無佢咁好氣。魚唇是最最最好味, 口感最好。雞腳稍嫌不夠"林", 有改善的空間。偶有佳作, 我很滿足了 ! 

自製鎮江肴肉

        真係唔係講笑, 我竟然可以自製鎮江肴肉, 講都無人信, 馬上拍照紀錄, 立此存照。在網上見到這食譜, 原來不是很難做, 只是要花時間來製作, 心裡突然有一個念頭, 很想試試, 立即去買魚膠粉﹝家中有急涷豬手﹞。

        首先要煮熟豬手, 切皮留用, 將肉切粒。先放豬皮墊底, 然後放肉粒, 倒入已處理的豬肉湯+魚膠粉+調味料, 蓋上保鮮紙, 上面放硬物壓着, 讓它定形, 放入雪櫃一小時, 之後取走硬物及保鮮紙, 然後把餘下的豬手湯倒入, 放雪櫃一晚, 大功告成 ! 

        成功了, 味道不錯, 媽咪都說不錯的, 好開心呀 ! 

鯇魚片蒜茸蝦粉絲

        鯇魚腩最厚的部份, 因為太厚了, 次次蒸魚都唔熟, 故此我會把最厚的部份切下來, 切片醃味, 放入玻璃盒內, 方便煮麵或煮米粉做餸吃。

        今天攪攪新菜式, 鋪粉絲放碟底, 中間放蒜茸蝦, 外圍放鯇魚片, 一齊去蒸。未蒸之前, 外觀不錯, 蒸熟後縮起來, 個樣麻麻地。味道方面淡了少少, 蒜茸唔夠多, 有大量的進步空間。

全麥饅頭

      我一直都想自己弄麥饅頭, 因為市面上賣的根本不是純麥饅頭, 呃人的。見到台灣 blogger 製作麥饅頭的圖片, 好想食呀 ! 今天終於的起心肝, 買齊材料, 擺好用具, 自己按着 blog 上的指示, 一步一步的跟着做。終於成功了, 由於我沒有落糖, 當然不會美味, 感覺是粗糙的, 但我喜歡吃粗糧的, 我對此成績是滿意的。憲兒說加入煉奶來吃, 都 ok 嘅 ! 

                                      搓成粉團, 等待發酵

發酵成功, 大了很多

分成六小塊

蒸熟了

南乳炆豬手

        今天千辛萬苦的煮了一碟南乳炆豬手, 老公及憲兒說味道有點怪, 真係激死人。幸好姨甥仔吃過豬手後, 說很好味, 好彩還有知音人。

美味的晚餐

        今晚我們享用了一頓豐富的晚餐, 不是出外用膳,但我又不用煮, 真是爽呀 ! 媽媽煮了青椒炒海參豬肉片, 給了我一碟。另外, 我去了超市買了茄子斑腩, 再去買我最愛吃的滷水乳鴿, 每人一隻, 為了保持鮮味, 我叫店員不用斬, 每人用手撕來吃。
        我媽媽的炒餸水準有保證, 海參十分好味, 三色椒又甜, 正 ! 茄子斑腩味道一流, 只是比較多油。乳鴿是我的至愛,  我個人認為這家的滷水乳鴿是全香港最好味的 , 用手撕來吃, 更加是好味到不能形容。老公及寶貝對這餐十分滿意, 因為不是我煮。

自製麵包 - 失敗

        妹妹買了樂聲的麵包機, 於是我把研究好份量的麥粉、高筋粉、黑糖、鹽、芝麻粉、雞蛋, 交給妹夫, 他替我再加入牛油及酵母， 全部放入麵包機內, 明天早上便有新鮮麵包吃。早上到妹妹家取麵包, 嘩 ! 真係嚇死人, 外皮卜卜脆, 但裏面好似路陷般, 麵包肉全都塌下來。根本不可以用刀來切麵包, 我只能掏出麵包肉來吃, 真攪笑。味道一般啦 ! 憲兒當然話不好吃, 但是我是可以接受到的。其實妹夫弄的麵包(不是用麥粉)是無問題, 我的份量真是要好好研究一下。

        請留意, 雖然麵包不漂亮, 但盛着麵包的康寧碟, 卻是我的至愛, 漂亮極了。這隻碟也是在淘寶買的, 在香港也看不到有這個圖案。

自己煮的海參冬菇排骨

        我買了海參, 媽咪幫我發。今晚決定炆一碟海參冬菇排骨, 這一碟真是大碟頭, 味道方面, 一般啦 ! 還有進步的空間 。憲兒說很好味呀 ! 不過製作過程需時, 真係少啲耐性都唔得。 

第一次用焗爐

      好友C小姐, 在我去年三月搬新屋時, 已買了一台 Delonghi 的焗爐給我, 我直至今天才鼓起勇氣去用此爐, 真係笑死隔離。因為我不懂用, 心中有太多問題, 坊間又找不到焗爐食譜, 我想清楚知道每種食物的預熱時間, 入焗爐所需時間, 我想要心中有底。另外, 說明書是全英的, 可以看得明, 但要專注一點去看, 而且內容不夠詳細清楚。焗爐內是熱騰騰的, 又擔心粗手粗腳的我會被燙到, 因此一直沒有用。

        去年至今已一年了, 再不用此爐的話, 我都覺得自己好衰, 終於的起心肝用焗爐啦 ! 我最不喜歡是時間掣, 難於掌握時間, 它不是輸入數字款式, 不能準確調較時間。我調較焗10分鐘, 我同時用手機的計時器計時, 原來只有8分鐘, 確實很難作準, 我唯有同時用計時器計時, 確保所焗的時間。我焗了11隻雞翼, 吃的時候, 我覺得啲肉好像太滑了, 我懷疑是未熟, 不過都已全吃光了。

紅坊紅燒花膠

        新年時, 好友C小姐買了一盒東方紅的紅坊紅燒花膠給我吃。今天決定加熱當作一味小菜, 花膠是很有口感, 味道也不錯的。反而冬菇太大隻, 味道一般。最奇怪是我覺得有點膠味, 不知是否是我的心理作用呢? 但最重要是要多謝C小姐的禮物及她的心意 , 謝謝 !