【名家搶先睇】2019大爭之世（Mr. Tregunter） ( 18/3/2018 - 7/5/2018 )

特朗普應該鍾意玩德州啤牌。成大業需要賭性，破產也需要賭性。人性天生怕痕又怕痛，所以中規中矩的人佔大多數，成大業及破產兩極之人佔少數。特朗普破產4次，然後登上美國第一人總統之位，賭性必然大。
德州啤牌類似話事啤，賽局中有時需要大額下注拋窒對手，要你唔敢跟。1929年大蕭條嘅教訓係玩貿易戰會全球慘，今時今日冇一個國家夠薑真係要四方八面開打貿易戰。
貿易戰真正目的，乃縱橫捭闔聯合陣線，以貿易壁壘作籌碼拋窒對方，再講數傾條件，減少貿易逆差及打開市場缺口。
特朗普口口聲聲要改善美國貿易逆差，看待此事不能太認真。布雷頓森林體系瓦解後，美元作為現代無錨貨幣體系的定海神針，美國一定要長期貿易逆差先可以派籌，否則市場上會唔夠美元。在此背景下，中國持美債世界第一，中國就係美元體系嘅頭號忠實擁躉。轉捩點就在於，中國唔想再大手買美債，並且要推人民幣上國際舞台分一杯羹。咁樣玩法就需要改變，一旦美國真係出現貿易順差，代表美國正在收回美元；若貿易逆差減少，也會間接導致美元再次成為搶手貨。此為伐謀。

中國挑戰美國秩序

3月22日特朗普簽署行政命令，豁免歐盟、澳洲、加拿大、墨西哥、阿根廷、韓國、巴西鋼鋁關稅，有效期至今年5月1日。但冇豁免中國、俄羅斯、日本等國。
無論是奧巴馬的TPP還是特朗普的貿易戰，目的都是拉攏各國入場形成中國包圍網；中國搞RECP、推一帶一路，橫貫歐、亞、非26國話大家有錢齊齊搵，不過唔包美國。毫無疑問，這是一場21世紀的合縱vs連橫。此為伐交。
全球75億人，中國14億人，幾乎每5個就有1個中國人。中國市場全球最大，史上最大。當日中國加入WTO，其中一個條件為開放市場。但各國整整吓發覺唔對路，要賣貨去中國唔容易，出入不對稱。中國看準各國心思，外資入嚟中國開公司往往需要技術轉移。外資最初諗住放少少技術畀中國冇問題，但當累積到一定程度，中國公司技術已威脅到原研發公司，而且比你平，咁就大鑊。特朗普以貿易戰作為談判籌碼，要打開中國市場缺口，同時減少以技術轉移為市場准入條件。此為攻城。
量變導致質變，中國經濟體量最終會驅使中國挑戰美國秩序。上戰伐謀，其次伐交，其下攻城。我哋應有一種覺悟，大爭之世，已經到臨。

南北韓將於下個月舉行領袖高峰會之際，南韓上星期五公開1,420份保密外交檔案。其中最令人矚目的，係1987年金正日搵過蘇聯幫手促成南北韓以聯邦形式統一。文件有30年保密期，但選擇呢一刻公開，似乎有政治意味。

我哋將地圖攤開會看到一個形勢。中國東、南兩面被日本、台灣、菲律賓等國連成的第一島鏈包住，要突圍就要向西、南馳突，也就是一帶一路之由來。南北韓統一這構想係一單超級大deal，基於各國之利害關係，南北韓無法自己傾而要搵中間人，亦即引入外國勢力。搵邊個外國勢力做中間人就係關鍵。1987年時中國未夠斤兩，金正日搵蘇聯好正路。但假如這個構想今日重現，搵美國定中國結果將截然不同。

相信中國曾有意促成呢單大deal（詳見舊文《金正男被殺謎團》），若由中國促成南北韓統一，等於中國有恩於朝、韓，整個東北亞局勢立即扭轉。東北亞擁有核武的國家，除中國外只有北韓；南韓有重工業、輕工業、高科技；北韓有廉價勞動力；南韓有文化軟實力。一旦出現咁樣嘅國家而又親中國，中國等於一步棋就將東北亞反包圍。相反，倘局勢演變成美國主導斬首計劃、策動政變等方法令金正恩下台，中國將深陷於包圍網。

金正恩及其幕僚睇到兩樣嘢：有核武先有數講，冇核武隨時畀人綁；中國顯露想在制定世界秩序上爭一席位之心，朝鮮有條件作為中國突破東北亞缺口的棋子。朝鮮繼續封閉，以核武威脅他國玩唔到一世，要確保金氏皇朝有得玩，金正日昔日構想係一條出路。

3月金正恩訪華，4月南北韓高峰會，5月特朗普金正恩會面。此外日本《朝日新聞》報道，日本正積極促成6月與朝鮮舉行雙邊首腦峰會。如成事，即金正恩3至6月都好唔得閒，分別要見中、韓、美、日4國領袖，六方會談暫獨欠俄羅斯。

金正恩搞咁多嘢目的只有一個，就係要坐得穩。用核武靠嚇唔係大晒，但冇得靠嚇金正恩又有乜可以同人討價還價？董卓被殺後，賈詡同董卓舊部李傕、郭氾講過一句話：「諸君棄眾單行，即一亭長能束君矣。」金正恩，唔會真正放棄核武。可以用來同金正恩交換棄核的，只有對其皇位坐得穩的承諾，而這個承諾需要聯邦制或東西德模式體現。朝鮮半島作為中美東北亞地緣政治的角力場，金正恩企圖游刃其中為己謀一席位，也只係大爭之世的開始。

要留意，中國已經用開戰前的外交辭令回應貿易戰。4月6日，新華社喺微博以中國開戰前慣用的外交辭令「勿謂言之不預」回應貿易戰，語出康熙上諭，用今日的話講即係「咪話唔單聲」。中國對印度、蘇聯、越南三次開戰前都在官媒用過此外交辭令。

好明顯中國想打斷特朗普「你大我1000萬，我反大你2000萬」嘅國際演出，唔想籌碼推得太高，最後落唔到台。因為勿謂言之不預嘅內在含意，係你唔好搞咁多花臣，我會跟到底，咁特朗普反而要諗是否繼續推籌碼。中國表明唔想打貿易戰，但問題其實在美國想唔想真正觸發貿易戰。也就係，特朗普此舉係短慮，還是長謀？

如果特朗普此舉只為中期選舉，以展現拋窒中國之勢刺激選民腎上腺素上升攫取選票，那只係短慮，貿易戰的確三幾個月便會玩完，不足與道。然而若特朗著此舉不只為中期選舉，所謀者為更長遠之事，咁就唔止玩推籌碼拋窒，反而怕中國唔落疊唔跟。

今日唔係19世紀，唔係以白銀作為硬通貨，單純入超、出超概念已不合時宜。再次強調，自布雷頓森林體系後的美元時代，美國一定要貿易逆差先可將美元派街坊。所以解決美國貿易逆差乃一偽命題，美國貿易逆差消失，意味美元派街坊的情況亦會消失。要出現如此情況除非我哋嘅貨幣系統唔再行美元體系，但現時冇可能，美國唔需要貿易順差。

執住美國貿易逆差來砌可達到3個效果，其一，擴大美國出口到中國之份額；其二，減少中國出口到美國之份額；其三，逼人民幣升值。第一點，即中國要開放市場；第二點，即壓制中國部分高科技行業增長；第三點，最簡單，人民幣升值等於中國貨加價，競爭力自然下降。

兜兜轉轉，你會發現點解同80年代美國對付日本嘅手法咁類似？因為現年70歲的美國貿易代表萊特希澤，曾任列根政府的貿易副代表，就係當日負責同日本打貿易戰，《廣場協議》幕後推手之一。中國經濟體量比昔日的日本大，中國人亦比較蠱惑，重複同樣的招數難奏效。所以手法要比往日複雜，過程要比往日長，原理卻仍然相近。

美國80年代對付日本的招數，其實像使用時間停止器。日本經濟就像凝結於80年代，30年前一碗叉燒拉麵800Yen，今日都係800 Yen。中國經濟若凝結於當下，談何崛起。

美元體系有兩大迴路，第一，石油美元；第二，債務定錨。
產油國賣石油只收美元，全世界都要石油，所以全世界都要美元。各國拼命賺美元買石油，產油國收美元後買美債及投資各類資產，係現時石油美元之迴路。至於債務定錨，各國賺太多美元後有錢冇碇使，只有美國國債先有條件作為載體，承接咁大額嘅資金而又流動性一流。美國持續赤字擴大債務，貿易逆差輸出美元，然後各國再返過來買美債，於是出現美國欠債越多美元地位越重要的怪現象。
將貨幣想像為血液便很易理解，兩大迴路有特定循環方向，如果迴路中的流量減少，甚至迴路逆行，會發生乜嘢事？隨着美國出口頁岩油及貿易戰，這個現象即將出現。美國2020年前後會成為原油淨出口國，同美國買油梗係用美元，意味美國會收回部份海外石油美元。美元回流美國後唔會消失，但原本作為石油美元中間人的中東國家等同被踢開，收入大減。現時全球主權財富基金持有7.1萬億美元資產，當中60%基金係靠賣石油起家。一旦美國不再入口石油並出口石油，靠賣石油起家的主權財富基金會收縮。

中國外儲死線不容有失

貿易戰亦同此理。過去有一種睇法，由於中國係貿易順差大國，咁人民幣自然應該升。以上說法省略了外匯儲備一項，事實上人民幣匯價更看重外匯儲備，而中國外匯儲備主要來自貿易順差及外資進入。中國外匯儲備由2014年近4萬億（美元，下同）跌至現時3萬億，唔見1萬億。為遏止外匯流失，中國扭盡六壬死守3萬億死線。貿易戰一旦開波，3萬億死線仲守唔守得住？一旦再次失守，容易引來人民幣拋售潮，人民幣要跌；央行想托人民幣匯價，自然又要用外匯儲備，形成惡性循環。
春秋時期齊國管仲打過一場貿易戰，就係派人去楚國高價買鹿。楚國人見鹿咁好賣，炒鹿好過耕田。當楚國鹿價大升時，管仲趁機出兵楚國。楚國人因掛住炒鹿誤咗農時，要復耕都冇咁快。要四出採購糧食又被齊國封鎖，最後楚國大敗。時代變遷，但貿易戰原理總是相近。日本80年代中過一次伏，中國會唔會中伏？人民幣雖名為SDR權重貨幣，但無自由流通之實，外匯儲備對中國而言仍十分重要。美國要求減少貿易逆差係虛的，要藉由減少中國貿易順差引發其他問題先係實。貿易戰，貨幣戰，美元回流，同時進行，全方位攻擊，貿易戰只係打開缺口的其中一步。

中國今日之境地同80年代日本相似，但有一樣不能比，就係當時made in Japan已風行全世界，而中國冇一樣嘢夠膽話自己由頭到腳做好。由始至終，各種中國強大的宣傳只有量的概念，無質的概念。當宣傳自己做得好時，理據卻係屏幕用韓國、鏡頭用德國、晶片用美國……就好似樓盤廣告都一定要碧眼金髮做主角先夠照。
科技研發需要人材，時間累積，以及一點運氣。想快，即係縮短時間累積，人材同運氣便好重要。只要出一個愛恩斯坦，物理學境界立即跨越幾代，技術也可以突破。可是回歸一個老套問題，點解中國土壤培養唔到橫空出世嘅科技人材？
舉國上下不停灌輸弱智邏輯，因為共產黨過去信奉列寧的布爾什維克模式，即係民主集中制，有幾條友商量都可以掛名民主啦。久而久之中國有兩套知識，平民學習一套知識，權貴學習另一套知識。真相，平民唔需要知道，冇資格知道。睇吓近年香港教育局就明白，花大量精力死搞爛搞旁枝末梢，從小引導思想在固定框架內，稍有反思即政治不正確。高官硬撐教育制度無可辯駁，仔女則有咁快得咁快送去美國。

美國掀貿戰時間剛剛好

人材同運氣相輔相成，要出一個人物，需要運氣，但教育做得好，出現天縱英才的概率會提高。教育看似長遠投資，對現下只想走捷徑的中國嚟講太慢，但只要博中一次即刻追幾代，教育其實先係捷徑。
中國如果真係想強大，最終需要解放民智。現屆政府強調中國要有底氣和自信，底氣同自信唔係睇你有幾多錢，而係睇你夠唔夠薑讓社會處於反思與辯證嘅環境下成長。
人民幣同國產手機一樣，當國產手機冇咗韓國屏幕、德國鏡頭、美國晶片，國產手機嘅價值喺邊度？當人民幣背後冇咗外匯儲備嘅美金含量，人民幣國際上的價值，即係匯價，應該係甚麼水平？
舊文《中國破局之斲輪老手》提過，德國馬克同日圓之所以能在國際貨幣體系內佔一席位，金融上經過萊茵資本主義及黑字還流，貿易上則經過made in Germany/Japan洗禮。「中國製造2025」計劃，即希望中國2025年達到made in China階段，此亦點解美國要呢一刻出手。
貿易戰會去到乜嘢地步？美國有三招：1917年《與敵對國家貿易法案》、1974年《貿易法》第122條、1977年《國際緊急經濟權力法案》，就睇呢三招會唔會出。


美國同中國打貿易戰之際，有一單大deal被忽略。美國司法部批准德國拜耳以625億美元收購美國孟山都，收購完成後，拜耳會揸住全世界25%種子同農藥市場。呢單deal點解重要？因為收購完成後拜耳會成為主宰全球種子同農藥市場嘅巨擘，造成壟斷，原本應該好難批，令呢單deal傾好耐。但美國司法部開綠燈，拜耳將科技作物部門以70億美元賣畀德國化工大廠巴斯夫，咁就唔係壟斷。貿易戰期間對德國巨企收購開綠燈，心水清的讀者自然明白咩事。

更重要係，中國的野心畀美國察覺。近年種子同農藥巨頭都在搞M&A，各大廠爭住做大佬。當美國陶氏化工收購美國杜邦農業部嘅時候，中國化工集團亦買下瑞士先正達，美國開始意識到中國想爭規則制定者之位，而且步步進逼。

共產黨建政後知道中國太落後，老老實實去追等到蚊瞓，要國際上有碇企就要搞不對稱制衡戰略，所以國防上先搞兩彈一星，即核彈、導彈、人造衛星。事實證明昔日方略有效，現時中國航母得啖笑，戰機冇外國引擎連飛都唔使飛，但兩彈一星起碼有自保抗衡威懾力。中國現時思維一樣，覺得老老實實去打根基太慢，要打就打不對稱戰略而且要行捷徑，其他慢慢嚟，但先發展AI，機械人，官方數字貨幣。以收購、合資等方式取得技術轉移，抄一次快過研究100年。貿易戰若講唔掂數，以下幾間公司有機會被重點招呼。

如果中國仍然好落後，美國話之你點搞。特朗普要用貿易戰對付中國，就代表中國對美國主導嘅世界秩序起碼稍有威脅。朝鮮似乎倒向美國，中國想尋求打開東北亞缺口失敗，咁美國下一步係伊朗，再下一步就係南海，西、南兩面封堵，一帶一路就變成空談。

80年代美國同日本打貿易戰，用上日本文藝片最常出現的道具：時間停止器。日本經濟恍若被凝結於80年代。今次對中國亦一樣，最終目的，係要將中國經濟凝結於2018年。伐謀、伐交、攻城上中下三路齊出；貿易戰、貨幣戰、地緣戰輪住嚟；美元萬劍歸宗、石油美元逆行，全方位攻擊。特朗普幕僚幾乎清一色鷹派，唔好以為佢哋食齋。

豐臣秀吉將要統一日本時，同德川家康打咗場小牧‧長久手之戰。德川軍只有豐臣軍三份一兵力，但以反奇襲打法令戰事陷入拉鋸。最後拖到豐臣秀吉有退意，明明自己比人強，點和談？豐臣秀吉私下同德川家康講，只要你認我做大佬，一切依舊。（全文完）

2018 狗年立春

雞年丁酉，今日終止，狗年翩然而至。根據萬年曆，2018年2月4日朝早5時28分就係立春節氣，即是雞去狗來，現在已是戊戌狗年。狗年立春之八字就係：戊戌年甲寅月丁卯日癸卯時。八字含四木二土一火一水，獨是欠金。如計埋納音，則戊戌平地木，甲寅大溪水，丁卯爐中火，癸卯金泊金，又戌土內藏戌土、辛金、丁火，故此如要講到金木水火土五行俱齊，都冇話唔通，但總是含金量不足，獨弱一門。
立春日元丁火，屬火命，此火是陰火，有無威力呢？正月立春乃初春之始，春天甲木當旺，立春八字有四木，其中甲寅係陽木，卯是陰木，故此木不嫌少，只嫌多，而丁火一定要有木生之，故此丁火似乎生機充沛，源源不絕。可惜嘅係，八字講求平衡，甲木相等於大樹一棵，無緣無故難生丁火，必需有陽金（庚金）劈之，使樹木成為木條，方能容易生火，偏偏狗年立春五行欠庚金，戌火內藏陰金（辛），或癸卯納音係金泊金，都係刀仔之類，唔通真係要刀仔鋸大樹，鋸成木條生火？此過程十分辛苦也，而且未必可行。
由此觀之，立春日有木無所用，「窮通寶鑑」云：「或一派甲木，無庚制之，非貧即夭；或只一甲木、多見乙木者，必離鄉之客……」呢番推論，今日或嫌過時，因時代唔同，現時社會組織比較完備，兒童受到保護，好難話係「非貧即夭」嘅，所以要用現代眼光詮釋古老術數專書之言，離鄉之客即是移民，移民並非全無機會，東南亞不少大富豪皆是福建潮州移民嘅後代！狗年日元丁火因木盛火塞，或枯草引燈，即是講日元丁火本命較弱，年柱戊戌雙土晦火，月柱木盛火塞，時柱癸水傷丁火，睇嚟今年狗年都幾煩，要希望「有金打救」，唯一一個亮點，係卯戌合火，維持一點「火氣」，不致斷絕。
應用到實際層面，立春八字多木，木尅土，屬土行業（地產建築類）可能受制，日元丁火較弱，屬火行業或會平平無奇，有命理專家話屬木行業最好（時裝、家具、環保、藝術文化、園藝等），左丁山睇咗一啲運程書及名家點評2018年狗年，發覺普遍係對狗年股市比較睇淡，一位名家更講明丁火代表經濟過熱，是年為爆煲之年，不知是否認為丁火日元身弱呢？呢啲事，一係信，一係唔信，正是信不信由你。不信者，一笑置之可也。 

左丁山

2018 狗年運程

2018年的春節（農曆新年）按西曆計，是2018年2月16日星期五，距今還有一段時間。前些時，左丁山與聯合校友游應森、何萬森等人吃晚飯，席間游兄提醒：「狗年將至，要不要找師傅一談狗年大勢？」左丁山說：「還有時間，慢慢未遲。」游兄說：「非也，師傅云2月4日立春，立春便是狗年到臨：狗年運程、方位由2月4日開始。」
一言驚醒夢中人，得游兄中介，邀得師傅傅會長沛基先生自大嶼山到中環，吃過午飯便到左丁山的蝸室寫字間講述狗年大概。因剛好記者小G人在中環，也一併邀請她到來作筆錄，以補左丁山的不足，以下是談話撮要，加上若干左丁山個人的詮釋，如有錯漏，當然是左丁山的責任，與傅會長無關。
2月4日星期日立春，時辰為早上5時28分，以古曆法計，即卯時，八字為戊戌年甲寅月丁卯日癸卯時，之前生人，仍屬酉年（雞），之後生人，屬戌（狗），譬如2月4日早上5時半出生的嬰孩，便是生肖屬狗。立春乃一年之始，戊戌皆屬陽土，狗年之狗，為狗公無疑，天干地支同屬土，份屬兄弟，彼此應該和洽，不似丁酉雞年，上火下金，火剋金，即上可壓下。故此雞年之內，中央一聲令下，人大釋法DQ議員，人大常委拍板決定一地兩檢，上方權威無可挑戰。
戊戌年似是上下和睦之年，除非有人好打得，挑起事端。立春之日，日元屬丁火，陰火也，狗有陰火，唔聲唔吠會咬人，故此求神拜佛，狗年不要惹火尤物，無事生非，激起怨氣，上面大人請勿使出陰招。
既然狗年將至，團年日子大可提前，師傅云現今世界化繁為簡，方可追上時代，傳統禮節來自秋收冬藏的農業社會，農村處於全民休息過冬的狀態，故此有不同日子謝灶，大掃除，團年等等，今人仍要忙於上班，大可簡化之，一天做完。
故此傅師傅指出1月29日星期一是大吉日，成日諸事皆宜，早上辰時至午時（七點到一點）皆吉時，可在家掃除，謝灶，吃團年飯，一切妥當，如要晚上吃團年飯，可選戌時（七點）後開始。或說不少人不慣這麼早團年，可否另擇日子，因為一般人以為在年卅（2月15日）團年的。經師傅指點，年三十是建日，指事情未辦好的開始階段，不太適宜，如要最接近年初一，應選2月13日星期二（年廿八）開日，指開通順利，凡事可行也，此日晚上五時後至十一時皆吉時，最宜一家晚飯團年。


傅會長講完團年吉日，就順勢講狗年開年吉日，2月16日年初一早上向父執輩拜年過後，午時未時皆吉（十一點到三點），可一併用作開年之用，是日為除日，除者，解除也。解除甚麼？係解除舊習，舊物，重新開始之意，用作開年之用，正合此意。一般商舖，多在年初二開年，狗年年初二（1月17日）為滿日，本來亦可，但適逢係庚辰日，辰戌相沖（即歲破日），開年可免則免，如一定要開舖，選吉時啦，巳時至未時（九點至三點）皆吉。因狗年（戌年）係辰戌相沖，故此狗年內所有辰時（上午七點至九點）皆是凶時，盡量免用。
開工又有乜吉日呀？新年假期由年初一放到年初四（星期五至星期一），2月20日星期二年初五返工，初五屬執日，可用，九點開工乃吉時。初六（2月21日）乃月破日，勿用，初七星期四（2月22日）係危日，早上冇乜方便吉時，最好日子係年初八（2月23日星期五）成日，乃黃道吉日，九至十一時係吉時，返工最正，通勝說明是日忌庚辰、壬辰生人，而是日係丙戌日，丙戌年生人者，師傅話也有避忌，但現代世界有一定返工標準，放假唔可以放得太耐，有時避無可避，唯有選取吉時而已。打工仔未必可以放假放到年初八，無假期嘅話，索性乖乖地在年初五吉時返工好了。
傅會長講到辰戌相沖，梗係問埋狗年犯太歲啦，犯太歲有四，最主要係辰（龍）沖太歲，丑（牛）刑太歲，戌刑未（羊），戌犯戌（狗），即是生肖屬龍牛羊狗者四類皆是俗稱犯太歲，以往左丁山會向會長訂購太歲牌，點知會長話年紀已老，設計及訂造白銀太歲牌好費神費力，今年唔再搞。哦，即是狗年無太歲牌可掛，信此事者只好自求多福，行事謹慎小心，或在新年時份，到黃大仙、車公廟、觀音廟等寺廟拜太歲咯。不信者，就順其自然可也，等到真的有事情發生，咪講句倒霉就算囉。
（作者按：1月18日本欄談余光中輓聯，余伯樂閱後來短訊指正，上聯頭二句應是左手成文、右手成詩（不是右手寫詩），否則與下聯「堅心以學，苦心以教，不稱」。左丁山翻讀手稿，確應如此，自己弄錯，謹此致歉！又，流沙河的輓聯，余伯樂估計上聯應是「二友重逢」，不是「重逢二友」，可能是網上資料有誤，或是左丁山抄錯！」）


傅會長話狗年四個生肖犯太歲，即狗龍牛羊，其中以龍沖太歲較凶，按照通勝天官賜福圖，傅會長逐個生肖作簡要評述：
狗（戌）：本命年，有吉星在頭上，即歲駕華蓋，歲駕即皇帝出巡，華蓋星有大智慧，技藝超群，亦主孤獨，孤芳自賞，容易出家為僧道；狗人狗年遇三凶星太歲，劍鋒（血光之災）、喪屍（白事），但既有超高層次，有智慧高人指點扶持，可逢凶化吉。律政司司長鄭若驊屬狗，看來如此，雖家有僭建，莫奈她何。
豬（亥），有天喜、太陽、天空三吉星，太陽星光明正大，有貴氣，天喜星為喜神，一喜化三煞，天空有加強放大，減少中和之意，令運程不至大起大跌，有此三星拱照，狗年雖遇「劫煞」，「孤辰」、「晦氣」（即遇騙子，親友過身，找晦氣）等不如意事，當無大礙。
鼠（子），吉星有天解，即解化災難之星，官非、疾病，可保平安，遇喪門、血刃、浮沉、災煞四凶星，問題不大。
牛（丑），刑太歲，幸有太陰、天乙、國印三星扶持，太陰月之精也，主靜、主富，為田宅宮之人；天乙，貴人也，命中吉神，人逢天乙，遇事有人幫忙，臨難有人化解，國印，皇帝帥印大權在握。有此三星在，牛人可說狗年一帆風順，雖有貫索（手拘，被捕之意）、勾神、的煞，破碎四類凶星，主有官非、刑事，亦可無事。（按：何志平屬牛，正遇貫索勾神凶星，如要保平安歸國，恐非要中南海最高領導人發功不可）。
虎（寅），頭上有三台星，為清貴之星，主權貴，有勢力之高官，煞星為指背、五鬼、官符、地煞，口舌是非多，總有達官貴人排解，不用愁。
兔（卯）：有月德歲合吉星，卯與戌合，狗年最夾最happy，月德乃太陰之德，積陰德也，狗年遇小耗，咸池、桃花、死符，小事滋擾，不會化大。
龍（辰），頭上空空如也，沖太歲，遇歲破，大耗、蘭干、月煞，慎防痛失錢財，諸事阻滯，因無吉星扶持，樣樣食自己，狗年小心行事為宜。
蛇（巳）有紅鸞、紫微、龍德、綠勳四吉星，主有喜慶事，貴人扶持，拿紫荊勳章有望，雖遇暴敗，天厄，亡神三煞星，不足為慮。
馬（午）有將星、天廚，如馬人係米芝蓮星級總廚，啱晒，有管理之神照住，近廚得食，食得是福，遇白虎、披項、陽刃三煞星，麻煩一陣啦。
羊（未）刑太歲。有天德、福星、八座三星拱照，天德係保護星，解煞星，可轉禍為福；八座，主讀書考試得利，福星就係天官賜福啦。於是羊人狗年雖然破太歲，仍然穩陣，遇捲舌、絞煞、三刑、披麻四凶星，慎防是非官非，可大事化小，小事化無。
猴（申）：有驛馬、文昌拱護，主多旅行，讀書好，升職有望。凶星有天狗、吊客、天哭，或會遇上車禍損傷打劫等事，小心行藏為宜。
雞（酉）：頭上空空如也要靠自己，凶星有病符，陌越、六害，主有病，陌越指有變動，因而壓力大，六害今年害太歲也。如要特別解釋就係因工作變動，轉換環境，又缺乏幫忙，遇上壓力，因而容易生病！


傅會長講解完十二生肖之狗年運程，指出較凶者會係龍（辰）與雞（酉），如要化解，可將太歲符放在吉利方位作擋邪用，信不信則閣下自決。
何方才是吉位？於是傅會長繼續講解通勝山位向月刊圖，通勝（蔡伯勵先生廣經堂）大字標題：戊戌流年大利東西不利北方，傅會長簡述如下：
正西（兌）：有二黑，主有流行性感冒、喉痛等病，疾病為患，於家中西位不宜有工程，可用黑色花樽載水八成滿放在西方化解，遇樽中水有油漬，即換水。
西北（乾）：有一白，主聲名、有太歲、小利，劫煞，可用前述方法化解。
正北（坎）有五黃，大凶星，主災難不祥，如家中大門向北，床頭向北，不可輕視之，可在北位放置一瓦缸黃牛（手掌大）阻擋五黃入侵。
東北（艮）：有三碧，主官非、爭執、吵架，在東北位放置三支富貴竹於黑色花樽。
正東（震）：有七赤，是非多籮籮（尤其是家中長子），放金色、銀色圓牌一個在東位化解。
東南（巽）：有八白，財源旺盛，荷包腫脹，遇小事滋擾不礙，為加強效果，以黑花樽載水放在東南位催財，女性更應如此辦。
正南（離）：有四祿，主感情變化，夫婦感情要注意，健康方面則注意眼與心臟，宜將黑色花樽放水置於南方化解。
西南（坤）：有六白，六白主權力，坤位有六白，即當權有威勢者為女士，此為狗年權勢位，在北方置黑色花樽載水，可加強運勢。
中宮（紫微）：中央方位為領導，名利權皆備，主席及CEO辦公室在此最宜。
講完一般家宅，傅會長多講幾句，指出從流年方位，最利中宮，世界中宮位以中國為中心，2018狗年中國位於最有名利權之紫微位，當主國勢興盛，位處中國南方之香港有四祿，感情有微妙變化，大概會係中央與特區之關係仍有磨擦，不時有爭拗。而香港之西南坤位正是扯旗山，今年由女特首林鄭月娥當權，剛剛合乎天意，亦可說林鄭女士食正條水，但是林鄭生於1957，屬雞（酉），於狗年無吉星扶持，缺高人幫手，雞人兼遇病符，陌越（陌生人不可靠），六害三煞星，睇嚟會做得好辛苦，分分鐘搏命得滯，做出個病來。

雞年立春啟示

一年易過，又到立春之日。睇節氣時辰，立春係在陽曆2月3日晚上11時33分，以一般坊間按採用嘅八字計算方法，立春在「夜子」時分來臨，應屬次日（2月4日）計算，如用此法，丁酉年立春嘅八字就是：丁酉年壬寅月壬戌日庚子時。

立春八字有甚麼啟示呢？去年2月4日本欄引述八卦丘之言，推論一番，指丙申猴年立春多火缺水，乾燥得滯，火猛則易燥，恐怕全年易生火爆事件，但火旺可生土，火多又剋金，故此房地產有生機，金融則不敢睇好。

今日睇番轉頭，八卦丘講得冇大錯，香港不幸發生工廈迷你倉大火，令消防員殉職，至到猴年年尾，沙田還發生長命山火，而全年地產旺盛，地價樓價不斷升溫，迫使政府推出新辣招。股市方面，2016全年冇乜升幅，股票得個揸字，除咗職業炒家炒上落市之外，一般散戶搵唔到錢，全靠在猴年農曆十二月，得益於特朗普效應，恒指先至反彈，令全年有滿意進賬。政治上則鬧出港獨、DQ事件，火藥味十足。

去年立春算係批得OK啦。雞年立春又如何？問番八卦丘，佢有如下推論：「雞年立春八字有三水二金一木一火一土。五行齊全，以水為主，壬水乃陽水，江湖之水，有奔蕩之性。但春天木旺，壬水氣弱，須有庚金生水，則生機水源不絕；水有氾濫之性，如亂撞亂撞，易失本性，宜有戊土制之（如城門河兩旁有石土壆防水氾濫），導之入正軌；此外，春天壬水比較冷，凍水無甚生機，最好有太陽照耀，就春江水暖，正晒。咁有冇呢？新年正月一定係寅月，寅內藏丙火甲木戊土，十分啱用，壬戌日之戌為火庫，內有戊土，辛金、丁火，即係話，八字雖然天干無丙戊，但火藏地支，亦相當有力，水唔會凍啦。時辰係庚子時喎，庚金顯露生水，亦正。寅戌內藏戊土，可起堤防之用，令壬水不致出軌。還有一點要注意，丁壬化木，木為壬水之食傷，洩一洩，令呢個八字出生嘅嬰兒將來更加聰明。唔，成盤八字算唔錯。」

廣泛引伸嚟講，雞年水旺，大勢向好，利水行業；水生木，屬木行業有水則靈，水剋火，屬火行業可能低迷一啲；水多洩金，金融業洩氣如濕水炮仗，一啲都唔奇；水被土剋，地產今年不受水旺影響。今年防水災多過防火災，水能載舟，亦能覆舟，不聽民意嘅政治人物，今年要注意嘞。


左丁山

2017 雞年運程

現在已係庚子月（農曆十一月），即係話乙酉雞年將至，年初一係2017年1月28日，冬至係2016年12月21日，俗語有云「冬大過年」，唔怪得中大聯合書院校友游應森來電提醒：「今年搵唔搵師傅講流年？」啊，梗係搵啦，唔係嘅話，蘋果讀者會來電郵追數㗎。於是多得游兄安排，12月8日星期四就約得易學會會長傅沛基先生專程自大嶼山出中環，到聘珍樓飲茶，飲完茶後就向左丁山講雞年吉凶。
今日起就節錄傅會長說話內容，敬希垂注，因21號就係做冬，首先問會長過年應該注意嘅日子。
（一）12月21日冬至（星期三），馬會都要讓路，夜馬改在星期四舉行，可見馬會好明白做冬嘅重要性。正式冬至係在是日丁丑日下午6時44分，酉時正值吉時，最合一家開飯做冬。傅會長建議大家六時半前齊集，一到6時45分就舉杯飲勝，開餐，祝願未來順景，帶來吉利。
（二）尾牙，初二、十六是店舖做牙之期，猴年尾牙在2017年1月13日（農曆辛丑十二月十六），適逢係庚子日閉日，日子不合，不如提前一天在農曆十五（己亥日開日），但不少人在初一十五食齋而做牙係食肉嘅，可改在1月9日（十二丙申危日），要注意，丙申日沖虎，己亥日沖蛇，老闆要揀在吉時開餐，9號酉申日在酉時（下午五至七時），12號己亥日在午時（上午十一至一時）或申時（下午三至五時），一般舊式零售店舖好重視尾牙，請留意及之。
（三）謝灶，大掃除：今時今日已少人留意，如照舊例，不妨揀農曆十二月十二（2017年1月9日）酉時，一併進行，以合當今慳水慳力慳時間嘅原則，於酉時在廚房煲水，煲嘴不可向西（有病），不可向北（有難），用碌柚葉浸煲，送走霉氣。
（四）團年：年卅在2017年1月27日星期五，甲寅日，適逢寅申相沖，係歲破，團年唔係幾好，傅會長提議可提前於1月21日星期六戊申日危日團年，22日星期日己酉日成日更佳，不過吉時就未必適合吃晚飯，因為星期六吉時在申時（下午三至五時），星期日亦然，晚飯時間（酉時，戊時）只係中中地，大家自行決定可也。注意星期六沖壬寅，甲寅年生人，星期日沖癸卯乙卯年生人。
（五）酉年開工吉日，2017年農曆年放假至1月31日星期四，政府及所有機構於2月1日開工，碰啱係己未破日，2月2日年初六更係四絕日，開工絕對不宜，要到年初七，年初八先至好，最正就是年初八，星期六，早上九時許上班，但星期六係休息日喎，大家自己度度嘞。


今年寫猴年犯太歲（1月18日），傅會長講猴虎蛇豬四個生肖犯太歲，沖太歲，害太歲，刑太歲，要戴掛太歲牌，但另有兩個太歲，即狗與馬，因頭上無吉星拱衞，在猴年比犯太歲者更凶險，更要掛太歲牌作防禦性。左丁山屬狗，就無端端在清晨揸車撞壆，成架車報銷咗，逼住要換新車，但人就乜事都冇，可云夠運，其實自己係每日不離太歲牌嘅。屬馬之梁振英就臨天光賴嘢，本來屬馬之人在雞年有吉星拱照，貴人扶持，點知都係捱唔到雞年轉好運，12月9日就宣佈棄選不尋求連任，嘥咗一位星相名家（在佢辭職前）大大聲講梁振英在雞年行運，篤定連任！
明年雞年又會點呢？傅會長話坊間所講係卯酉沖（兔雞），兔沖太歲；酉刑酉，雞人刑太歲；酉戌相害，狗人害太歲；子鼠就係破太歲，以上四個生肖當然要掛太歲牌，但根據去年經驗，未（羊）及申（猴）年生人因無吉星，亦不可不防。至於各生肖運程，可睇通勝之天官賜福圖，傅會長逐個簡述：
子（鼠）有太陰、天喜兩吉星扶持，顯示得有力人士（可能係女性）照住，提防官非入衙門。
丑（牛）有四吉星──三台、天解、黃蓋、唐符，指有高官高人幫忙提點，行事順遂，提防官非，唔見錢，白事。
寅（虎）有月德國印兩吉星，即超高級大人物撐腰，提防小偷、扒手、白事。唔通葉劉會誇啦啦六國大封相？
卯（兔）沖太歲，乃凶險之年，頭上無吉星，要食自己，遇上紅燈不要衝，提防耗力耗財而無所得，諸多阻滯，係雞年最無運之生肖！曾司長要搵高人度一度點樣化解。
辰（龍）有紫微龍德兩大吉星坐鎮，理應好好，只怕自己無積福，遇上天災，碰到黑天鵝，即是行事謹慎保守的就幾掂。
巳（蛇）有天廚一粒吉星，雞年大可遍嚐美食，但提防賊仔嚟搶嘢兼被人篤背脊。
午（馬）有天德、紅鸞、福星、祿勳四星扶持，理應仕途得意，一帆風順，喜事重重，可惜亦有凶星四顆，披麻、卷舌、咸池、桃花，指有白事，是非色情醜聞，行為要小心啲。梁特可惜等唔到咯。
未（羊）頭上無吉星，凶星就有四顆，均與親友死訊有關，不致傷身，運氣平平。
申（猴）頭上亦無吉星，凶星三顆，提防染病，少去殯儀館及提防騙子行騙。
酉（雞）有文昌、玉堂、將星、歲駕四吉星扶持，即文星武將皆為己撐腰，應該好掂，只防犯法、見血及白事。林鄭與老虎葉劉有得砌！
戌（狗）須防被講壞話、唱衰及交通意外，但有太陽吉星照耀，光明正大冇有怕。
亥（豬）不過不失，有驛馬、天乙、地解三吉星，主多旅行，無事不可解決，慎防貪污，或有白事。
以上依書直說，信不信由你。 


講生肖運程，係比較粗疏一啲嘅，詳細推算還要有齊個人嘅時辰八字是否配合得宜及排列大運等等，不可一概而論。今年1月19日本欄引述傅會長講三大高官（梁特、林鄭、莊曾）之猴年運程，指屬馬嘅梁特在猴年運程最差，林鄭與莊曾都好好。眨吓眼到咗年尾，梁特突然間孤立無援，黯然宣佈棄選，令全港大出意料之外，亦令街頭響起歡呼之聲，故此流年運程之說，固然不可盡信，亦不可輕視蔑視之。

雞年方位吉凶又如何呢？傅會長教左丁山睇丁酉年山向月利圖，內容頗繁複，左丁山在專欄只能作撮要簡錄，如有錯漏，鬧左丁山可也。
中央：一白位，中央泛指中國，一白乃聲名，顯示中國在雞年國譽隆盛咁話。
東方震位有八白，八白指銀両，東方旺財有銀両，顯示亞洲經濟興旺，但有三煞（坐煞災煞生煞）恐有地震天災，禍及人群。
東南巽位，九紫坐鎮，指喜事重重，偶有小事阻頭阻勢。
南方離位，五黃之地，不吉，主苦難大而頻繁，印度澳洲等地有麻煩。若家門向南，宜放置啡黃灰色地氈及在門口旁邊放置黑色樽，內放滿八成水。
西南坤位有七赤，指爭吵多，議論不絕，得個講字。
西方兌位，三碧掛帥，指爭吵劇烈以至有分裂離婚之虞，宜在家中西方放置紅色花瓶或紅色燈。
西北乾位有二黑，指疾病來襲，不要在東西北方位牆上打釘，如有必需，則打釘後用碌柚水抹打釘地方或燒黃皮葉浸水灑之。平時放置紅色塑膠花樽，八成水，宜放紅花，祈轉禍為吉。
北方坎位有六白，六白代表權威，有權話事，香港人最知道邊個係老闆及大老闆身處北方。
東北艮位有四綠，指男女事，好聽啲就係浪漫愛情拍拖，男士難聽啲就係慎防帶綠帽或甩拖。
以上各點，又係信不信由得你，唔好鬧左丁山迷信。今年1月20日本欄引述傅會長講猴年方位吉凶，指西南方不可太歲頭上動土，偏偏香港高鐵及主要基建皆在西南方，而工程不順利及有延誤，都算中咗幾成。綜觀過往幾年經驗睇，方位吉凶之說，宏觀啲睇，大致無錯，若要微觀深入，還要配合更多因素，否則風水師咁辛苦用羅庚慢慢逐尺檢視嚟做乜喎。左丁山與各讀者人在東方，當然高興，知道今年東方有八白（銀両），但因東方同時有三煞，須慎防天災地震影響市道唔見銀！


左丁山

2016 猴年運程

去年年尾，到史丹頓街一間西餐廳吃午飯，經理竟然細細聲問：「左先生幾時講流年運程呀？我年年都追㗎。」哦，又俾人認出，冇得走。《蘋果日報》影響力甚大，廣告商因政治原因而抽蘋果廣告，其實係有苦自己知，正是傷人而不利己，純屬政治行為。
經此位仁兄一提：醒起猴年將至，於是搵聯合書院校友游應森兄聯絡易學會會長傅沛基先生，請佢出到中環一聚。憑游兄面子，傅會長答允於一月七日見面，於是約好當日，先到陸羽飲茶，再到左丁山寫字樓詳談三小時，現憑簡單筆記，寫一個撮要，供讀者參考，大家信則有，不信則無，想睇就睇，唔想睇就此一連四日唔睇「G G細語」便是，最傷神就係一路追讀，一路鬧左丁山導人迷信，人之不同，各如其面焉，有好多讀者係每年等住左丁山寫嘅！
2016年第一個星期，全世界股市跌到四腳朝天，港股A股大跌唔在講，連美國杜瓊斯指數一星期內亦累跌1079點，創近數十年紀錄。左丁山首先就問傅會長，五行對此，有何指示，傅會長話猴年要在2016年2月4日立春先至開始，但乙未年己丑月（即2016年1月6日至2月4日下午5時45分）係地支相沖！丑未相沖、相刑、相害，而丑為金庫，金受刑沖，金融不穩矣，故2016年1月，股票冇運行。（按：傅會長早在去年末接受他報訪問，已有此意見，並非馬後炮）。2月4日猴年伊始，是為丙申年庚寅月，偏偏寅申相沖，重演丑未相沖之局，好彩未致相刑相害，比1月好一啲，3月5日開始辛卯月，卯屬木，受猴年地支申金所剋制，仍無起色，4月4日下午入壬辰月，辰為土，可生金，傅會長話股市金融在西曆4月，農曆三月可以喘定回穩了。到了5月5日為癸巳月，巳申可化水，水為財，股市較為有利，6月5日為農曆五月甲午，午火剋申金，股市有波濤，之後到了農曆九月10月8日戊戌，市面和緩，維持穩定到年尾。綜觀2016全年係先苦後穩之局，陽曆1至3月不宜炒股。政治方面，傅會長話特區政府添馬艦係「穿窿樓」，有結構性風水缺點，甚為不吉，特區政府難有誠信，陽曆6、7月之交，有大示威也說不定，傅會長請大家來年持盈保泰，行事要謹慎小心。



約兩個月前，左丁山在居所搭𨋢，落咗兩三層，有一名貌若40幾歲嘅男士行入嚟，眼神一接觸，佢就低聲歡呼一聲：「想唔到你住在我樓上。我由九龍塘搬咗入嚟冇幾耐，係為咗個仔讀書入學。我呀，幾年前睇你寫開年開工吉日吉時，照足嚟做，嗰年生意好好，老婆跟住生咗龍鳳胎，好運到不得了！」咁講法，左丁山嚇咗一驚，不敢相信有此奇遇，可能係呢位男士八字生得正，碰上好運嘅啫。
但不止一次，確係有不少讀者注視傅沛基會長講吉日吉時嘅。與會長講完股市，就問佢團年、開工吉日。會長話今年時間十分緊逼，因丙申年初一在2月8日，但立春日在2月4日，猴年無立春，俗稱盲年，故此團年謝灶應在2月4日之前，而不是等到年廿八、年廿九。
既然如此，謝灶團年不妨一日做晒，最佳日子莫如2月2日（年廿四；星期二），黃昏時候開始（酉時，下午五時後）至晚上皆是吉時，拜祖先之後一家共吃晚飯團年，啱晒，而且呢日係祭灶日㖭。次選吉日係1月27日星期三及1月28日星期四，視乎大家返工時間表而定。
講到年初一（2月8日）係庚申日，與正月庚寅月，正好寅申相沖，是為月破：（按，立春之日為丙申年庚寅月，寅申相沖，年月相沖，亦係破日）踏入新年兩個最重要日子，都係「破日」，並非吉祥之兆，因此開年開工要特別小心。傅會長話一般店舖會在初二開年，是日（2月9日）為辛酉（危日），算係吉日，上午五時至一時均是吉時，開年幾啱。打工仔呢，最好就係年初三（2月10日）開工，是日為壬戌（成日），上午9時至11時開工，最為妥當，但當日係假期噃，點開工？傅會長叫左丁山當日9點幾返到辦公地方開吓工作電腦，用布抹枱，寫番一篇稿，便算係開工，然後鬆人繼續放假。如果真係唔得，唔方便，又點？初四（收日）政府一定開工，唔理想，在年初五（2月12日）（開日）大清早（五至七時），或午飯時間未時（一點至三點）返工更好。喂，仍然外遊未返噃？咁就年初八（2月15日，除日）星期一啦，11點至1點最好。聽完會長之言，開工時間有啲傷腦筋，好彩左丁山係自由職業自由身，返工日期與時間可以靈活啲，可以年初三揸車返中環叫做開工，然後到沙田馬場睇「一片光明」（如果報名做正選嘅話），可以攞番個新年贏馬頭彩。



每年都有人犯太歲，猴年太歲名管仲，天干屬火（丙），地支屬金（申），納音屬山下火。
傅會長講，申年生人肖猴，屬本命年，犯太歲，可能有血光、是非、閒話、白事之痛，但因有吉星歲駕（泛指高人、高官），文昌（有文化之人，今時今日應是學者教授級人馬）扶持，應無大礙，前途唔錯。
寅年生人肖虎，沖太歲，凶星主耗費金錢，虧大本，大上大落，幸有天解、驛馬兩吉星幫手，即在危急時有重量級人物相助，而且不時去旅行，避免在港心思思，炒股會炒燶破財！
巳年生人肖蛇，刑太歲，有官非、白事、是非、被篤背脊之苦，幸有天德（好運）、福星（有福）、祿勳（搵銀）三吉星坐鎮，逢凶化吉。
亥年生人屬豬，害太歲，主有官非、被暗害、被孤立等事，幸有太陰（女強人）、地解（有權有力之人）、天陰（有名聲分量之人）三吉星相扶，有驚無險。
以上猴虎蛇豬犯太歲，沖太歲，刑太歲，害太歲等，需要掛戴太歲牌「維穩」，以求心安。但下列兩生肖，傅會長話比犯太歲更凶險，猴年最黑，更要掛太歲牌，不可或忘：
戌年生人肖狗，在猴年全無吉星護衛，是非多多，雖無大害，但困擾身心，傷神害體，無人扶持，靠晒自己。
午年生人肖馬，亦無吉星，只有凶星主施手術、撞車、吵架諸如此類麻煩嘢，無人幫忙解困，小心則過。
其他六個生肖都幾好，未年生人肖羊，有紅鸞吉星，主有喜事，拍拖成功，但要防疾病，已婚之人，防因利多別離（指男女為公事飛來飛去，冷落另一半）。辰年生人肖龍，有華蓋吉星保護，即有料高層人士如教授等照住，雖或有官司白事，仍吉。卯年生人肖兔，可能被奸人騙財，但有紫微、龍德（接近皇帝之大臣，高官上司也）兩吉星，唔怕。子年生人肖鼠，有五鬼渾水摸魚偷錢搞事，犯官非，幸有三台、將星、唐符三吉星，即軍、政、司法界高人幫手，冇有怕。丑年生人肖牛，可能被襲擊，搶劫唔見錢，幸有月德、天喜、國印三吉星扶助，有利。酉年生人肖雞，有桃花劫，俾人找晦氣，不宜搞婚外情，但有太陽天乙天空三大吉星拱照，均權勢有運之人也，即有煩惱亦可解困有餘。十二生肖之中，猴年狗人、馬人，最應小心，一旦有事，隨時孤立無援，要廣結人緣，唔好亂發脾氣得罪人。



講過生肖運程，左丁山多口問吓傅會長，特首梁振英在2016猴年會唔會行好運？根據公共紀錄，梁振英生於1954年8月12日，生肖屬馬，會長話：「你𠵱家都知道猴年肖狗肖馬之人全無吉星在宮，即係話孤立無援，樣樣靠自己努力嘅啦。至於梁先生是否內交了得，北京有貴人撐佢，則非吾所知也。」係嘅係嘅，以「天官賜福」論斷，屬馬之人在猴年係辛苦啲。會長話大體而言，生肖寅申己亥（虎猴蛇豬）之人，較重事業，生肖屬辰戌丑未（龍狗牛羊）較重理想、原則，生肖屬子午卯酉（鼠馬兔雞）就講多啲情感，當然亦有例外之處，例如三位特區最高官梁振英（屬馬）、曾俊華（屬兔）、林鄭月娥（屬雞）皆係極注重事業、能登高位之人，尤其是梁先生就似乎係完全事業掛帥，感情冷酷之士。

以八字講運程，曾與林鄭都會好過梁特。曾俊華生於1951辛卯年屬兔，來年有紫微星、龍德星扶助，咦，唔通中南海有高人睇住佢？不過兔人有擎天、飛廉、暴敗三顆厄星在位，主破財唔見錢，而曾先生啱啱係香港特區財神爺，管公眾荷包，咁樣，係唔係2016年又有市場不穩，有大鱷想食香港呢嚿肥肉，或至少咬番幾啖呀？請曾財神爺謹慎理財！另一解釋，或者係有高頭大馬要伸手入兔仔嘅三窟掠水，亂派一通呢。
林鄭月娥生於1957肖雞，有威人（太陽），幸運之神（天乙），大人物（天空）拱護，主有天貴人扶持，唔似得隻馬仔食自己，只防高大野馬走來踢竇，搞到有是非、晦氣，情緒不寧。曾與林鄭已係做官做到最高級，仍有貴人呵護，唔通貴人會係特首咩？一定唔係，只好推算曾生林太在北京中南海有大人物睇起。
三大特區政府高官之中，竟以最高級嘅特首運程最差，整定成個香港唔夠運。不過傅會長話做人做事應從樂觀處看，否則好容易怨天怨地，破壞良好意願。特首權力雖大，都要受政務司司長及財政司司長制約吓嘅，唔可以一個人話晒事，打橫嚟。既然兩名重臣（曾與林鄭）有「皇帝身邊的人」射住，特首雖惡，不可能動搖特區根基。
依書直說就係咁講，還是要講一命二運三風水，講詳盡一啲，要按照個人生辰八字推算，只談生肖，當然比較粗疏，結合到風水咯喎，添馬政府總部大樓嘅風水麻麻，不利坐在裏頭嘅掌權人，但限於現實政治，好難變動啫！ 

左丁山 

風水可信不可迷信

按照十二地支的法則，每隔6個地支，就成為180度的對角，因此形成「六沖」。例如，1為子、2為丑、3為寅、4為卯、5為辰、6為巳、7為午，由子到午，中間順序數：丑、寅、卯、辰、巳、午，數到第6個地支，就是「六沖」，即子午相沖。

再看方向，子居正北，五行為水，午居正南，五行為火，南北兩極，水火相沖。在十二生肖中，子屬鼠，午屬馬，於是這兩個生肖相沖。同樣道理，牛羊（丑未）相沖、虎猴（寅申）相沖、兔雞（卯酉）相沖、龍狗（辰戌）相沖、蛇豬（巳亥）相沖。每逢相關年份，相關生肖就犯了影響力最大的「沖太歲」。今年是乙未羊年，牛羊沖，牛犯了「沖太歲」。重要擇日，要避免日支與年支、月支相沖，也要避免與當事人所屬生肖相沖。

有人認為，除了擇日，生活細節也要避免與自己的生肖相沖。例如肖蛇者不穿有豬圖案的衣服、肖豬者不要吃蛇羹、肖兔者不吃雞……其實，風水可以信，但不可迷信。若按此推理，豈不是肖狗者不能穿龍袍？而事實上，歷史中亦有生肖屬狗的皇帝。若太迷信，那肖鼠、肖牛、肖兔、肖龍、肖蛇、肖羊、肖雞的人都不能務農，以免沖了馬、羊、雞、狗、豬、牛、兔這些動物了！

三界五行：道德修為改變命運

德，是中國傳統教育的重點。《道德經》是道家寶典，道有說的意思，可以理解為：這是一部講德的經。儒家更將德行具體落實到15個層面：仁義禮智信，溫良恭儉讓，忠孝廉恥勇。現代教育提倡「五育」，不論德智體群美，還是德智體美勞，都把德放在首位。

人要積德；從事任何工作，職業道德是衡量首要標準，無職業道德，連人格也失去。佛家和道家講因果，積德是因，福報是果，一個人就算命理再差，只要不斷積德，都會有好結果。如何積德？只要做到上述儒家的15個德行就是了。

仁，是大愛的最高境界。仁愛即是博愛，一視同仁，關心對方。漢字很有意思，仁，二人，考慮問題要顧及對方，站在對方的處境着想，可減少紛爭，縮窄分歧，求同存異，最終達致雙贏。美國警方的心理學家與防止罪案專家更建議警務人員與賊人「易位思考」，站在對方角度，往往能發現保安漏洞，減少罪案發生。知己知彼，在人際關係，可互利雙贏；在軍事上，可百戰百勝；在人生中，可立不敗之地。這其實就是用修為去改變命運。

方向宇

中環在線：風水指數估恒指 羊年七月見頂

大家就快送馬迎羊，股民喺羊年會否有斬獲呢？前年蛇年估錯晒嘅中信里昂風水指數，馬年爭番啖氣，神奇地估中晒舊年嘅港股走勢，佢哋噚日再接再厲發表第廿一期風水指數，話木羊年恒指雖然唔會好省鏡，但都唔會太差，仲話大市升到七月見頂。

馬年估中大市走勢

中信里昂馬年預測大市會喺八月見頂，然後反覆回落，再喺羊年來臨之前反彈，結果恒指喺舊年九月初見頂，十二月底反彈，預測同實際趨勢都非常脗合。雖則佢哋算唔到A股大反彈呢一着，但有唱淡博彩同資源股，都算交到功課。
嚟緊羊年，中信里昂認為「土」會受克制，但「金」同「火」暢旺，房地產、再生能源同埋大宗商品仍然可以得到一個「喜氣羊羊」評級。公用、電訊同埋金融股就應該會跑輸。
指數方面，開局會受惠「乾柴助烈火」，一直升至新曆七月先見頂，跟住反覆回吐至九月先反彈，再係十二月掉頭向下。
對於大家關心嘅A股，雖則風水指數無涉獵到，但就話今年運勢喺北方，所以中國股市應該有好表現。同樣道理，雖則今年香港樓市不及內地樓市，但正北方仲有運行，古洞同錦田都有得諗，嫌遠可以諗寶馬山同北角。屬於「羊入虎口」嘅衰位就喺黃金海岸、三聖、鴨脷洲同摩星嶺。
究竟風水指數可唔可以連續兩年都咁準繩，邊有人知啫，但正如佢哋研究專員馬卓藍（Cherry）噚日話齋，畀大家have fun，或者跟住就會有好運嚟啦！

李華華

2015 年羊年運

去年二月四日年初五立春，左丁山問八卦丘批一批，指出馬年恐怕（一）火災多；（二）市民火多氣頂谷到爆；（三）政治僵局可導致火頭四起，街頭示威多。講經濟就話秋冬之時，金水齊來，香港運程會好一點，傳媒方面，報紙唔慌會好，屬火之電子互聯網則十分興旺。

眨吓眼，一年過去，今日又係立春之日，係乙未羊年開始之日，於是前幾日又搵八卦丘傾吓偈，批一批。今日立春係乙未年，戊寅月，辛亥日，甲午時。八字有2土3木1水1金1火。日主係辛金（陰金）。辛金見於春天一月（正月，今年係戊寅月），開始有陽氣，但寒冷未除，要有太陽照耀，方得暖和，太陽即係屬火，但八字之中，只有丁火（午，陰火），似乎熱量不足，還好寅內暗藏甲木、丙火、戊土，故此寒氣可除，令辛金不致凍僵。

暖就暖嘞，辛金生機如何？八卦丘話，戊土土厚，難以生金，己土生金最好，但立春之日，己土藏於未，唔算明顯，而且甲木在時，有剋土之能（令土失去作用），幾唔盞。八卦丘盤算一輪，話正月辛金最好有己（土），有壬（水）同時出現於四柱，但今年立春木多，春月木旺嘅話，需陽金（庚金）剋制之，方可護土，偏偏立春八字缺庚金，木勢不可擋，故此辛金偏弱，難以睇得太好。去年馬年立春係丙午日，火太多且強，今年羊年立春係辛亥日，木當道，日主辛金勢孤力弱，在實際層面，有何指示？八卦丘推論話：「羊年木多壓土，恐怕房屋土地要受壓，樓價回一回氣，不足為奇，買樓買地產股要謹慎啲，日主辛金體弱，雖有壬水（藏於亥）沖洗，顯得清高，但無己土生發，金融唔會叻得去邊，股市係浮浮沉沉格局。政治方面，木係東，金係西，以中國為中央，東方係美國，西方係歐洲，似指美國強，歐洲陰柔疲弱，土在中央，即中國啦，木剋土，中國不甘心受美國勢力壓制，定有暗戰，但在羊年還不可以超越美國。去年甲午年，天干屬春，地支屬火，火焚木，以下犯上係常態。今年則調轉，上乙木下未土，下面受壓制，故此去年學生反政府，今年就係政府砌學生咯，梁振英政府會採取強硬政策對付反對人士！」

地產潮文：層樓會變廢紙？

香港人未必關心香港有否真普選，但一定關心自身的物業能否長升長有。近日有中方官員對英國外交事務委員會主席Richard Ottaway表示，中英聯合聲明的有效期是由簽署時的1984年至回歸時的1997年，現時已失效。由於中英聯合聲明和基本法均有保障私有財產權的條文，假如情況屬實，香港物業的私有財產權的法律基礎將會變得極度脆弱，不少港人畢生積蓄很可能付諸東流，後果不堪設想。

中英聯合聲明的附件三和基本法第121條指出，年期於1997年6月30日以前屆滿的已批出土地契約，均只需按土地應課差餉每年繳付租值3%的租金，便可續期至2047年6月30日而不需補地價。假如中英聯合聲明失效，這些土地和樓宇業主可能需要即時補額外地價，對不少業主構成負擔。另原本保障新界丁屋相關土地的條款亦會作廢，新界原居民的土地權益也會大受影響。

基本法就是根據中英聯合聲明列明的方針所制訂，當中第6條保護私有財產權；第105條更保障財產的取得、使用、處置和繼承權，並指出徵用財產的補償應相當於該財產當時的實際價值，這些條文為香港房地產市場的興旺提供重要法律基礎。作出任何投資決定前應該慎重考慮。如今中央政府對法律和契約的信用已經備受國際社會質疑，假如中央政府不及時澄清有關中英聯合聲明失效的言論，將會帶來另一次信心危機，香港物業有可能變成廢紙，而「置業帶來財富增值」的成功方程式將會從此消失。

地產小子

大棋局：2015大時代 ﹝ 六至十二 + 後記 ﹞

四年前有一張CCTV「群眾喜迎油價上漲」圖名震天下，相信你都睇過。後來被證實係惡搞圖，但今日嘅惡搞圖如古代民謠，互聯網時代觀察呢啲比起睇乜乜民調更加有效。
呢幅圖其實透視着中國將傳統經濟學調轉嚟玩。貨幣有外在值同內在值，內在值反映喺國內價格，外在值反映喺國際間價格，亦即滙率。近十年美國不斷催促中國將人民幣大幅升值，表面理由係因為美國長期貿易赤字，講白啲，即係話中國貨賣得太平頂爛市。但根據J-Curve Effect同Marshall-Lerner condition，滙率係咪解決到貿易磨擦其實存疑，而且美國長期貿易逆差衍生出派籌效果，美元霸權更加穩固，所以呢個係偽命題。中國知道真正原因，唔肯將人民幣一次過大幅升值，又礙於雙方合作關係，所以出現群眾喜迎油價上漲一幕。
當時中國諗，如果人民幣不得不升，提高外在值對自己冇乜好處，倒不如調轉嚟做，提高內在值。所以中國一面加最低工資，一面減油氣補貼，藉住提高生產成本，而令最終售價提高。咁樣人民幣就算冇大幅升值，已達到美國表面上要求中國貨唔好太賤價嘅要求，既塞住美國把口，亦將所需升值嘅部份留喺國內，稍為補貼平民。
呢個概念香港人應該特別容易明白，當經濟衰退時，一係資產價跌，一係滙率跌。97樓市爆煲但港元滙率唔可以郁，所以經歷六年通縮期。此即前述概念嘅反面。
點解中國要咁樣做？因為八十年代日本嘅教訓歷歷在目。

人間五十年

日本神話傳說太陽神交咗三件神器畀天皇，分別係現存伊勢神宮嘅八咫鏡、熱田神宮嘅天叢雲劍，同埋東京皇居嘅八尺瓊勾玉。代代天皇相傳，意義就好比中國嘅傳國玉璽，所以後來日本人好鍾意用「三神器」嚟形容當代重要事物。
二次世界大戰後全世界百廢待興，需求旺盛嘅背景下各地經濟急速增長，五十年代中日本正處於「神武景氣」時代，出現咗新時代嘅三神器：黑白電視機、洗衣機、雪櫃。現代漢語用「景氣」呢個詞彙形容經濟，係來自日文。
第一波經濟增長由剛性需求帶動，第二波經濟增長就由提升生活質量嘅需求帶動。到六十年代中日本處於「伊奘諾景氣」時代，又出現新三神器：彩色電視機、冷氣機、汽車。當時日本嘅GDP已經超過西德，成為世界第二。就算到今時今日，買電器好多人仍然講究要made in Japan。
可以留意，日本早期經濟增長強勁，主要係靠出口起家，即係賺外滙。當出口需求飽和時候，就會出現轉型困局，尤其製造業。去到八十年代日本累積咗太多錢，而出口開始難做，轉型成為內需嘅過程中就容易出現炒風。凡係生意難做，賭場就旺，呢一點同樣香港人特別感同身受。九十年代香港製造業越來越難做，漸漸地大量廠商發覺做咩生意，不如賣廠賣地炒樓賺得仲快仲多，最終導致97樓市爆煲，日本都係一樣。
就喺呢個時候，美國提出似曾相識口號：美國嚴重貿易赤字，美元太強，日圓、德國馬克太弱，日圓應該大幅升值。喺1985年，以美國為首嘅五大國，包括日本、英國、法國、西德喺紐約廣場飯店開秘密會議，檯底下講掂數返去一齊做世界，喺外滙市場狂掟美元，做低美元口價。結果《廣場協議》後由原本250日圓兌1美元，三個月升到200日圓兌1美元，一年後更升到150日圓兌1美元。
但美元跌得太快引起國際市場大幅波動，終於1987年各國頂唔順，五大國連同加拿大，又喺巴黎羅浮宮講數，要一齊制止美元向下碌。當時美國其實可以用加息嚟緩和美元貶值，但美國又怕再加息影響經濟，所以就叫日本減息。同樣招數今日可能重現，歐洲已經開始買債，如果逼到中國減息，美國加息時間就可能延後。
日圓大幅升值後日本人赫然發覺買嘢越來越平，法國蒙田大道高級奢侈品商圈成街都係日本人，個個一袋二袋咁掃；將當年偷襲嘅珍珠港夏威夷買落嚟，島上八成商場、餐廳、酒店、度假村都係日本人開，年年去夏威夷度假嘆世界。日圓升值出口生意難做，加上減息，史無前例嘅全民炒樓狂潮湧現，無人相信土地會貶值，將樓同地按完再按有賺無蝕，當時東京二十三個區嘅地價夠買起全個美國。散戶買名牌，大戶買資產，三菱買起紐約洛克菲勒中心一半、SONY買起荷李活哥倫比亞電影公司、PANASONIC買起美國環球影業，剎那間日本人自信心返晒嚟，所有人都認為日本時代終於來臨，報紙頭版社論係要買起成個美國一雪前恥。
一個恥字，羈絆一個民族嘅命運。好多人唔知道，靖國神社最深處密室其實係供奉一把武士刀。日本呢個民族對事情有無法言喻嘅執着，而呢種執着，往往容易被人引導去想你到達嘅目的地。（待續）

辦公室嚟咗個新同事自卑又自大，經常針對其他人，無論係茶水間女同事嘅耳語定後樓梯男同事嘅高談，條件反射可能都想挫一挫其銳氣。但有個人同你講可以調轉嚟做，嗰位仁兄就係三千年前吳國嘅孫武先生。
二戰時美國對各國嘅民族性着手研究，其中搵嚟人類學家潘乃德（Ruth Benedict）研究日本，寫咗一份好出名報告，就係後來嘅《菊花與劍》。呢本書概括咗日本人兩大特性：矛盾、恥感。
日本二戰失敗嘅轉捩點可以話由偷襲珍珠港開始，所以八十年代經濟起飛第一時間係去買起夏威夷。但美國面對日本呢種大規模經濟入侵並無特別阻止，反而傳媒更加配合高唱日本時代已經來臨，呢股高漲氣氛一直持續到1989年12月29日，該年最後一個交易日。

金融戰爭卑而驕之

當日，日經平均指數升到38957.44點，係歷史上會當凌絕頂一刻。38957.44點如曇花一現後，日本人就再冇見過呢組數字出現係交易板上。1990年第一季日經跌穿30000點，同年末逼近20000點，到1992年已跌至近14000點。二十五年後嘅今日，日經指數仍然喺呢個水平上徘徊。隨股災而來係樓市崩潰，日本從美國買下嘅資產，最後要斬倉賤價賣番畀美國。
個問題出喺邊度？用五段話你就能明白。
-1美元最初兌250日圓，拎住100億美元去日本，可以兌25000億日圓；
-25000億日圓炒日本股、日本樓，到1989年假使升值一倍，賬面值已經50000億日圓；
-《廣場協議》後美國要求日圓升值，為方便解說取其約數，假設日圓升值一倍，1美元只可以兌125日圓；
-最後外資開始拋售日本資產，股市、樓市見頂，50000億日圓可兌400億美元班師回朝；
-100億美元入場，拎400億美元走，完全空手入白刃。
美國呢場合法打劫，將孫武「利而誘之，亂而取之，實而備之，強而避之，怒而撓之，卑而驕之」發揮得淋漓盡致。
睇到呢度相信你已明白，點解中國唔肯畀人民幣大幅升值，就係唔想重蹈日本覆轍。但中國經濟開始走下坡，人民幣有貶值壓力；呢個時候日圓大幅貶值，中國出口更難做；同時美國停QE，準備加息，美元轉強；人民幣匯率如果唔能夠保持偏強態勢，美元萬劍歸宗情況下，容易引發外資離開中國；中國又怕人民幣太強重蹈日本覆轍。可見每一着都係睇住中國關節位嚟打，見你每每想調轉嚟做時就專攻你之不得不救。
十七世紀意大利政治哲學家維科話歷史係螺旋形前進，意思係歷史總係喺度重複，但每一次嘅高度都唔同。馬克思嘅歷史唯物辯證法有相同睇法，任何事物都存在矛盾，而呢種矛盾係推使人進步。歷史會因矛盾而從正、反、合嘅形式進行，套用前述例子可理解為當出現一件事後，吸收教訓，為避免重蹈覆轍，會做相反嘅事；做相反之事又會衍生出其他問題，而令到事件走返去同原本非常相似嘅地步，但情況經過正反相合，縱然相似，高度已唔同。
所以列寧話內容前進，形式復歸。西方人第一次聽可能會頴晒頭，但中國人一聽就明白。毛澤東點解咁多主義唔揀而要取馬克思為用，因為佢明白呢套嘢同中國人嘅太極觀太相似。
一方面中國經濟有步日本後塵之虞，另一邊廂俄羅斯亦面對如八十年代油價崩潰嘅困局。石油係俄羅斯經濟命脈，52%財政收入來自石油同天然氣出口。近期油價不斷破底，盧布不停貶值，俄羅斯央行10月30日公佈嘅外匯儲備已跌至4391億美元，終於10月31日俄羅斯一次過大幅加息1.5厘保匯率。歷史循環驚人地相似，係巧合？（待續）

國際油價不斷破底，亞歐𥧌會後俄羅斯總統普京直接話「陰謀隨時都在上演。如果油價繼續維持在每桶80美元左右太長時間，全球經濟可能會因此崩潰。」呢段話出自年輕時專門從事間諜、情報任務嘅普京，別有一番意味。
蘇聯KGB特工出身嘅普京，可以話前半生都同陰謀、地下工作分唔開。作為OPEC外最有影響力嘅產油國，俄羅斯今日嘅財政係以大約每桶油100美元為預算，執筆時油價已跌穿80美元。面對咁嘅困局，相信已勾起普京三十年前一段回憶，當年嘅普京，未夠四十歲。

石油戰爭揭幕

近代出現過三次石油危機，第二次發生喺1979年，伊朗出現伊斯蘭革命，冇幾耐又爆發兩伊戰爭，油價一度升至41蚊。
時代嘅變動可以將一人一國推至頂𥧌，亦可以將其踩至地底。西方國家因為能源危機要慳電，造就咗東方香港一個人物，就係造風扇起家嘅劉鑾雄先生；同期五千公里外一個國家，亦因為係產油大國而受惠，嗰個就係蘇聯。
冷戰時期美蘇對峙，二分天下，美國因為能源危機經濟受打擊，蘇聯反而呢個時候搶灘成世界第一產油國。美國表面上冇計，但其實已經係到計緊數。1977年CIA出咗份報告《The Impending Soviet Oil Crisis》，蘇聯嘅石油產量八十年代初會到達頂𥧌，之後就會碌落嚟。
一個大國，一個以石油出口為主嘅大國，如果計到數知其石油產量即將見頂，用咩方法可以搞掂對手？其中一個方法，就係幫佢谷大條數，當對家條數谷到頂時，而石油出口開始下跌，只要呢個時候國際間有人大幅拋售石油，蘇聯就會玩完。
終於1985年，美國盟友沙特將石油出口由每日200萬桶一下夾到1,000萬桶，油價當堂打到去10蚊邊水平，蘇聯因為油價大跌每年要蝕過百億美元。1986年CIA再出報告《Implications of the Decline in Soviet Hard Currency Earnings》，油價低企，想頂油價減產的話，意味蘇聯要用非常多嘅油去換非常少嘅美元。
美國目的已達到，當你以為美金好好搵時，一反手要你用大量資源去換佢印出嚟嘅銀紙，趙孟能貴之趙孟能賤之，就係呢個意思。
今日嘅俄羅斯領土雖然細咗，但體質方面已大有改進。俄羅斯現時有4,000億美元同1,000噸黃金儲備，債務佔GDP比重亦只得10%，環顧四周欠債纍纍嘅國家，俄羅斯顯然健康得多。
俄羅斯真正嘅問題，係經濟上太過依賴石油同天然氣出口。俄羅斯嘅預算報告，預測2014年收入約13.57萬億盧布，其中石油同天然氣相關收入約6.5萬億盧布，佔收入差唔多一半。根據俄羅斯聯邦儲蓄銀行計算，如果油價維持喺90美元，2015年俄羅斯財政收入就會減少1.2%；油價要維持喺104美元，俄羅斯先可以維持收支平衡。
橫睇掂睇，今時今日石油戰都難達到八十年代效果，而現時環境有一個最大改變，就係美國都即將成為石油出口國，醉翁之意，可能不在酒。花旗銀行最新嘅報告《The Rapid Rise of the United States as a Global Energy Superpower》，估計正常情況下美國2020年會成為淨原油出口國，而樂觀嘅，可能2018年。但出口石油呢個市場，美國算係新仔，所以今次石油戰，非常大可能係一次搶market share嘅部署。
根據美國能源信息局公佈數據，全球五大石油淨出口國，分別係：沙特，886萬桶（每日．下同）；俄羅斯，720萬桶；阿聯酋，254萬桶；科威特，234萬桶；伊拉克，224萬桶。美國雖然油產量達1112萬桶，但每日消耗1849萬桶，每日仍然要輸入737萬桶，但隨住頁岩油開發，全球能源市場可能翻天覆地。
問題就係呢到，其他老大哥論資排輩，坐係到食呢口飯幾十年，美國要插隻腳入嚟就代表有人要走。唔同地方嘅產油成本唔同，油價一路跌就等同一場淘汰賽，情況就好似香港都有報紙戰，報紙賣1蚊就會頂死一兩間。現時距2018年只有三年，開始做嘢差唔多。（待續）

除非有美國咁嘅國力，否則要人指定用自己嘅貨幣做買賣好難。咁樣嘅情況下有乜方法可以令人唔用人民幣唔得？關鍵就係所賣嘅貨要全世界都冇而中國有，嗰樣就係中國資產。滬港通，就係賣中國資產。

或者你醒唔起，QFII係台灣發明，滬港通有冇得炒，可以參考一下台灣。台灣股票由1983年喺紐約交易所掛牌ADR引入外資開始，到1990年推出QFII，再到2003年取消QFII配額制，最後2005年全面被納入MSCI新興市場指數，成個過程23年。

滬港通有冇得炒？

亞洲四小龍呢個名現時已好少人提，出現得最多係八十年代，亞洲國家嘅黃金時期。西方先進國家因為發展成熟，地價、人工等成本太高，好自然地搵發展中國家轉移勞動密集型產業，日本、亞洲四小龍都係呢個背景下迅速冒起。
同日本經歷相似，台灣股市、樓市一直旺到八十年代尾，就喺呢個時候，台灣出現「無殼蝸牛運動」。發起人係一個小學老師，運動後佢想參政失敗，淪落到喺街邊賣鍋貼，呢個人就係香港都會見到嘅某鍋貼連鎖店創辦人，但暫不贅，稍後另文再談。
當社會上出現呢種大型抗議往往也就係景氣見頂或見底時候，1990年2月12日台灣加權指數升到12682點後開始向下碌，碌到10月2485點先見底，係導致台灣不得不加快開放嘅原因之一。同年底，台灣推出QFII。
1996年台灣開始畀資本自由流出，MSCI新興市場指數計入台灣股市50%市值。1997年台灣再開放期貨市場畀境外投資者，2003年取消埋QFII配額制，2005年MSCI新興市場指數計入台灣股市100%市值。
從台灣發展路程去睇，自1990年見歷史高峯後，台灣股市上上落落，隨後都係10000點左右就見頂，指數上睇，似乎幫助唔大。但台灣股市2005年全面納入MSCI新興市場指數時，市值約140,000億台幣；而截至今年11月14日，市值258,626億台幣。
畢菲特曾經講過，當股市市值同GDP比超過100%就要小心。台灣現時比率係170%，美國126%，而中國近年都徘徊50至60%。就咁睇，中國似乎低水，但唔可以用太老實眼光睇中國股市，上完市老細「着草」，盤數真假又估佢唔到，莊家圈錢坑殺玩到你渣都冇，先有今日咁嘅結果。
不過滬港通應該有得炒，唔係因為中國股市低水，而係時勢所逼大陸唔炒唔得。中國苦惱緊要唔要減息，美國又萬劍歸宗，驚減息外資離開。中國經濟開始走下坡，要刺激經濟就要壓低市場嘅融資成本，股市旺可以恢復融資角色。所以搞番旺中國股市相信已經係國策一部份，個場唔旺佢都要自己搞旺引你埋去。
其次，滬港通亦可以達到執靚自己套制度效果。閂埋門自己玩時可以亂嚟，打開門要人嚟就變成一種競爭，市場力量下，太亂嚟嘅自然會慢慢被淘汰走。更重要係，買內地股票一定要用人民幣。只有養大中國股市個池，養大外國人用人民幣嘅胃口，中國先可以加大人民幣嘅影響力。（待續）

終於，中國減息。

過去半年中國不斷用各種定向放水方法向市場貼現，就係唔想郁大政策，包括全面減息同減存款準備金率。但搞咗半年都係唔掂，今次減息釋放了一個訊息，利率市場化繼續推進。
利率其實係一種篩選，個市有得做時，最強競爭力者可以畀最高嗰口息。當一個國家要用到減息去刺激經濟時，反映個市普遍已冇得做或好難做，毛利率越來越低。中國一個特殊情況係，大企業可以借到錢，但細企業好難借。細公司去借錢，銀行驚你着草；大公司先有得借，因為大公司多數同國企有關，老闆着草中央會揹。
所以經濟轉差時更加要打貪，貪污係一種生產成本，等同以溢價去生產一件貨，但溢價唔會體現喺件貨質量上，賺錢自己袋，蝕錢國家揹。當個市開始難做，日紙、韓紙等亦大幅貶值頂爛市時，打貪就係釋放盈利同將枱底經濟納入稅收範圍。
當減息消息一出，市場焦點即集中喺減息，但其實單係今個月，內地公佈了多項措施。

（一）減息

今次人行減存款息口0.25%至2.75%，但上浮區間由1.1倍改為1.2倍，其實係朝三暮四定朝四暮三嘅問題。原本存款息口上限係3%X1.1=3.3%；現時2.75%X1.2=3.3%。由於內地銀行都面對存款流失問題，存款息口一般畀到頂，所以結果都係3.3%，可以話無分別。
而貸款息口減0.4%至5.6%，減幅比存款息口大，正路嚟講銀行息差會收窄。但銀行可以郁上浮區間，係咪跟足要等市場決定。
同時，將存貸基準利率期限級別簡化，存款方面，冇咗五年期定期存款基準利率；貸款方面，簡化為一年以內（含一年）、一至五年（含五年）同五年以上三個級別。
所以今次減息，係一種放權，畀銀行更加多自主權，根據市場狀況嚟睇餸食飯，亦即部署緊利率市場化。

（二）增加存貸比彈性

現時內地銀行根據《商業銀行法》第三十九條規定，存貸比係75%，即係收100蚊最盡可以借75蚊出街。但近年內地銀行存款流失，其中一個原因係餘額寶呢類新產品同銀行鬥搶存款。存款越少，可以借出街嘅錢就越少，要壓低社會上嘅融資成本，其中一個方法就係將餘額寶呢類產品計埋入一般性存款，民生銀行估計咁樣做可以釋放7.4萬億人民幣信貸。
中國所有呢類分數式規定，從來都係玩定義。貸款係分子，存款係分母，將某啲貸款唔當貸款，將某啲唔係存款當係存款，就搞掂。情況就如《九品芝麻官》蔡少芬賣藝不賣身，徐錦江話玩完佢唔畀錢咪唔係賣。

（三）資產證券化

人行公佈減息前一日，銀監會都出咗條《關於信貸資產證券化備案登記工作流程的通知》，話「信貸資產證券化業務將由審批制改為業務備案制」，其實即係放鬆。簡單嚟講，審批制係交上去等批，唔批就冇得做；備案制係銀行可以先做，做完先備案。將資產證券化係國際大勢所趨，有利資產流轉同抵押融資。
講咁多，原理都係一個，就係經營環境轉差要壓低借錢嘅成本，生意先有得做落去。近代央行管理市場嘅招數嚟嚟去去都係兩款，一係Taylor Rule，一係McCallum Rule，前者郁價，後者郁量。減息係郁價，可以預期，之後內地好大機會郁量，例如減存款準備金率。
天下熙熙，皆為利來。任何國家減息都容易引來貨幣貶值預期，不過對大戶嚟講，名義利率唔係最重要，重要嘅係實際利率。美元萬劍歸宗，油價下跌，大宗商品下跌，有利美國將加息周期延後，美國出錯機會就細。但只要中國調轉嚟玩，牌面減息但保持實際利率正數，就可以喺芸芸實際負利率大國中跑出。（待續）

人民幣國際化最重要嘅關鍵係，點解其他國家要人民幣做儲備。此道能破則成其大業。一隻新興貨幣要登上國際舞台好難，但如果同你講人民幣與美元價值一樣，人民幣就有得玩。
港紙之所以可成為國際流通貨幣，其中一個原因係港紙兌美元滙率穩定，揸住7.8港紙等於揸1蚊美元，你有信心呢7.8港紙隨時可以換成美元。就如當年美國曾經承諾只要你揸住35美元，就可以去央行換1盎斯黃金，所以我哋叫美元做美金。
過去睇一隻貨幣嘅價值係睇其成色、含金量，現時則睇含美金量。我哋對人民幣嘅印象一般係因為過度濫印，尤其中國M2已接近120萬億人民幣。但如果又同你講拆開條數，人民幣含美金量其實非常之高，會唔會好似包龍星咁嚇到咳咗個膶出嚟？

人民幣拆數　含美金量高

先列幾組數字出嚟。
1.中國外滙儲備3.89萬億美元（9月末）
2.外滙佔款29.53萬億人民幣（10月末）
3.狹義貨幣M1餘額32.96萬億人民幣（10月末）
4.廣義貨幣M2餘額119.92萬億人民幣（10月末）
自94年大陸滙改開始，美元兌人民幣大約係8蚊至6蚊，取其中位即7蚊。中國外滙儲備係3.89萬億美元，乘7等於27.23萬億人民幣，就同M1差唔多。即係話，中國嘅基礎貨幣含美金量，其實非常之高。
以上為方便說明，先用最簡單方法講出概念。其實睇美元兌人民幣歷年平均滙率，將外滙佔款除外滙儲備就差唔多，即7.6。而因為中國嘅貨幣發行制度，M1條數本身包含外滙佔款。

其次係貨幣乘數問題，銀行收存款後唔可以全部借晒出街，例如存款準備金率係20%，即收100蚊存款可以借80蚊出去；80蚊又存去另一間銀行，再借八成出去即64蚊。如此不停重複，最後100蚊會創造出500蚊賬面數。中國現時存款準備金率，大型金融機構20%，中小型金融機構16.5%，理論上貨幣乘數係5，但實際係4左右。外滙佔款29.53萬億人民幣X4=118.12萬億人民幣，就同M2差唔多。
中國M1含美金量非常之高，M2算唔算濫印？美國截至11月17日嘅數字，M1係2.84萬億美元，M2係11.56萬億美元，以滙率6.15兌成人民幣，即M1係17.5萬億人民幣，M2係71.1萬億人民幣。如果就咁比較，中國印錢似乎太多。但美國M2同M1比例係4.07倍，中國係3.64倍，雖然中美貨幣定義略有不同，但總體上差唔多。

所以人民幣國際化攻堅處係要向外推銷人民幣含美金量非常之高，拍吓其他國家膊頭同佢講儲人民幣同儲美元差唔多，再醒啲着數過佢，人民幣先有望成為儲備貨幣。但以上一切都係基於一樣嘢：滙率。當年美國搞掂日本，係玩樓市+滙率；搞掂蘇聯，係石油+滙率。一旦美元萬劍歸宗，美元升而人民幣跌，上述死數就唔係咁計。
中國明顯洞察到危機所在，人民幣國際化步伐越來越急，每三幾個月就推一項新措施，盛傳出年初就會搞存款保障制度。共產黨係信馬克思，馬克思嘅唯物辯證認為量變會導致質變。當你有400億美元儲備時對個世界冇影響，當你有4,000億儲備時對世界都冇影響，但當你有40,000億儲備時，美國一覺瞓醒發覺你已成為美元體系一部份，要切除唔得，唔切除又唔得，蔣介石如果翻生，當有同感乎？

2015之所以係大時代，因為我哋正處於世界權力再平衡時期。重新審視一下現正進行及即將出現嘅事件：

─美元升值、加息預期形成，萬劍歸宗蓄勢待發；
─人民幣搶攤國際化，無論股市、經濟、政治，近期中國每一樣嘢都夾硬嚟，八百里加急；
─日圓以賭命形式貶值，向全世界頂爛市；
─歐盟籌備明年第一季QE，準備加入貨幣戰行列；
─美國、OPEC、俄羅斯石油混戰，用絞殺嘅方法睇吓邊個最先頂唔順；
─俄羅斯面臨如八十年代蘇聯覆亡困局，每日燒外滙，債務違約危機正在倒數。
其中最重要嘅，係人民幣國際化，因為人民幣國際化，就意味向二戰以來美國揸莊嘅國際貨幣體系挑戰。任何一個政府都會因為「Parkinson's Law」不斷作出無謂嘅擴充，美國坐上鑄幣稅莊家位後亦然，而維持呢種格局係需要巨量成本。所以美國騎虎難下，而人民幣國際化將直接衝擊呢個格局。

支付貨幣排名搶灘

至於人民幣國際化嘅衝擊力，可以從兩個角度去睇。
根據SWIFT（環球銀行金融電信協會）統計，全球二十大支付貨幣之中，人民幣過去影都冇，但截至今年9月，已經跳到上第七位（見圖）。人民幣由進入二十大開始就急速爬升，勢頭似乎大好，但此刻其實已達樽頸位。
二十大排名榜只需睇頭四個，第一位美國佔約四成，然後歐元三成、英鎊9%、日圓3%，四國加埋已超過八成，其地位幾乎係牢不可破。換句話，要插入前二十大再跳級容易，但要躋身四強好難。
但留意二十大支付貨幣中，港元亦排第九。假如將來港元同人民幣因某啲原因合併計算，就已經同日圓睇齊，甚至取而代之，可見香港之重要性。所以你會見久唔久有人出嚟唱港元應同人民幣掛鈎，唔係唔可以，係時候未到。
進入二十大，對手係經濟體較小嘅國家，但當逼入第四位，要再上，就意味要向頭三位直接爭佔有率。美國以抽天下之鑄幣稅維持其領導格局，所以呢方面，係唔會讓亦無可能讓。

下一步決戰紙黃金

如無推斷錯，中國下一步就係向紙黃金埋手。紙黃金唔係指一般非實金買賣，而係指一樣非常重要但非常少人提嘅野：IMF特別提款權（Special Drawing Rights,SDR）。
SDR1969年面世，係一種記賬單位，亦係一種國際支付特殊手段。簡單地講，IMF分配SDR畀各國，當某國出現貿易逆差時，可以用SDR換其他成員國嘅外滙、自由兌換貨幣，再找數。所以SDR雖然唔係貨幣，但因其流通性及認受性，同黃金、自由兌換貨幣一樣，可以作為各國儲備。而且，對本國貨幣唔能夠自由兌換嘅國家而言，SDR顯得更加重要。
經過多年執位，SDR現時權重由四隻貨幣構成，分別係美元、歐元、英鎊、日圓。相信你已留意到，同前述SWIFT頭四位嘅國際支付貨幣排名如出一轍（見表）。
上述權重以每1 SDR計，即係話一個SDR，包含0.66美元、0.423歐元、0.111英鎊、12.1日圓。折換成美元的話，1個SDR就=1.456755美元。
SDR每五年執一次位，下一次係2016年1月1日。中國如果要正路地靠貿易、滬港通、發債去谷大人民幣使用量，隨時十年廿載都未掂。但SDR提供一個捷徑，假如人民幣可以逼入成為權重貨幣之一，人民幣無端端就會成為國際間自由兌換貨幣。
天下鑄幣稅莊家之位，任何一個國家都覬覦，差在你係接受現狀，定敢於挑戰成規。美國高唱眾國衰退時自己經濟復蘇，頁岩油多到準備出口，Petrodollar回流，萬劍歸宗；中國話自己股票牛市重臨，人民幣國際化遍地開花，有錢入嚟齊齊搵，乾坤大挪移。閼與之戰時廉頗、樂乘等趙國老將都認為地勢太過險狹，冇得打。惟獨趙奢力排眾議，認為狹路相逢，如兩鼠鬥於穴中，邊個大膽邊個贏。2015，就係狹路相逢嘅時代。（全文完）

懸空綁一條蘿蔔喺驢仔眼前，驢仔會不斷追趕蘿蔔，但永遠咬唔到。通脹，就係我哋嘅蘿蔔。
去睇樓，經紀第一句實講：「唔貴喇陳生，你睇吓樓下茶餐廳，仿西班牙黑毛豬唐喬凡尼午餐肉配多瑙河畔野山鳳凰煎雙蛋飯加咗幾次價，樓價點會唔升？」如果銀行發現你有多餘錢，姐姐仔實係用林志玲語氣講：「李生，同你介紹番吖，呢隻產品保本又升值唷。」
似乎，我哋每日四方八面都接收一個訊息：「銀紙貶值，買嘢啦！」

通脹與大蕭條

通脹係咩一回事？貨幣學派解釋最直接，印錢太多，通貨（錢）多於經濟活動所需。經濟解釋唔一定係外國專利，古代中國嘅說法更有意思，《史記》叫呢種現象做錢薄物貴。錢太多，所以薄，購買力就跌。
凱恩斯因為從政府角度睇，所以凱恩斯學派多一點為政府說項味道，將通脹加入需求帶動同成本帶動兩種。前者意謂多咗需求，產量不變嘅情況下，價會被搶高；後者則指麵粉貴咗，所以貨品會貴。
仲有其他解釋，此處從略，但無論邊一家說法，印錢權力不在你我，所以控制通脹嘅責任在政府。於是我哋需要回歸現代經濟嘅三波浪潮，去審視呢五年來人類史上最大規模嘅貨幣系統實驗QE究竟有冇效。

活在第三波臨界點

第一次世界大戰後百廢待興，實質需求旺盛，經濟復蘇為第一波。
要買嘅都買晒，人工就得咁多，商家跟住點賺錢？分期付款喺二十年代首次正式大規模使用。用金融或會計嘅角度，分期付款就係將未來嘅收入提早折現，打入商家當下賬面上。用透支未來嘅方法夾增長為第二波。
由於透支過度，產能過盛，加上後來各國央行決策錯誤，做成二十年代末嘅大蕭條，而大蕭條後嘅經濟困局引發二次世界大戰。二戰後世界經濟重複第一波及第二波浪潮，我哋學精咗，第二波後點樣維持增長？就係浪費。過去一部電視用十幾年，現時年年出新款引你買，你唔買部電視三年都會自動燒。用浪費增加汰換率維持經濟增長為第三波。
但凡事有盡頭，浪費到盡後，仲有咩方法？通脹。只要通脹穩定地維持每年3至5%，所有人都會為忙於追逐蘿蔔而唔得閒理咁多嘢，天下則無事。透支未來同浪費喺複利率威力下顯得越來越唔重要，漸漸被湮沒。我哋正處於呢個階段，也就係第三波之末段。
稱其為末段，因為呢套嘢似乎都即將失效。執筆時紐約期油57.8；芝加哥農場三寶，粟米407.5、黃豆1,047.25、小麥606.5；紐約棉花60.54；東京橡膠195.9；倫敦白糖390.4。全部價格都跌番去QE前口價。美國通脹升唔起，歐洲面臨通縮，中國疑似通縮，日本向來通縮，唔係印咗錢咩？
五年前我哋因為害怕大蕭條重臨用印錢嘅方法頂住，但五年後我哋又再重新面對如大蕭條前原材料急跌、產能過盛夾擊。人類史上最大規模嘅貨幣系統實驗QE，究竟可以醫病，定係如嗎啡咁只能止痛，好快就會知道。但歷史話畀我哋知印錢係唔可以逃避循環，如果印銀紙可以解決一切，昔日羅馬帝國唔會滅亡，國民黨唔會敗走台灣，津巴布韋應該係一流強國。
 

Mr. Tregunter

註：作者為《地利根德閣》blogger，著作有《樓市撈底攻略》