東歐遊訂機票及酒店

去年11月, 老公無聊的看看往匈牙利的機票, 竟然是來回4000 多元連稅, 嘩 ! 真的好平。因此我也上網查一查, 阿聯酋航空   ( 多次奪得全球最佳航空公司的榮譽 ) 來回東歐機票包 20kg 行李連稅, 坐 A380 飛機, 都只是港幣四千幾元, 真係好抵。如果包 30kg 行李, 來回票為HK$5,161, 我與老公馬上扑鎚, 太抵了, 可以去探兒子, 替他帶一些行李返港, 怕他回程時行李超重, 我與老公又可以順道到東歐旅行, 一舉多得。

機票買了, 我便要考慮每個國家逗留的時間來訂酒店, 在一星期內便在 Hotels.com 也訂了酒店。   
5/5 - 8/5       布拉格  -  K+K Hotel Central
8/5 - 13/5     維也納  -  The Radisson Blu Style Hotel
13/5 - 17/5   布達佩斯  -  7 seasons Apartments Budapest

在三月份時看到有關維也納的blog, 全都大讚 Hallstatt 小鎮的美麗景色, 非常值得去觀光。於是致電 Hotels.com 可否取消10/5 一晚維也納酒店, 保留其餘四晚, 對方表示要整個 booking 取消, 重新預訂。我當然唔制, 我當時訂是大約HK$1500 一晚, 現在訂要二千多元一晚。但我實在很想去 Hallstatt , 如果由維也納坐火車去 Hallstatt 要 3.5小時, 還要坐小船才可抵達小鎮。如果即日來回, 實在太辛苦。結果我們決定多付一晚錢在  Hallstatt 住一晚酒店。

10/5     Mondi-Holiday  Seeblickhotel  Grundlsee  

新志記海鮮飯店

今天與老公到太子附近, 見到一家舊式海鮮飯店, 雖然無裝修, 但光顧的人不少, 深信應該會是好味道。我們兩個人要了三個餸, 品嚐過後, 好失望。碟頭是大的, 價位又不是便宜, 地方又不是潔淨, 裝修欠奉, 味道一般, 以後都不會再來吃這家了。

竹笙雙翡翠  $82 - 西蘭花很硬, 無味道

蒜子火腩大鱔煲 $180 - 燒肉最好味, 鱔不夠味

薑蔥焗美國生蠔 $170 

生蠔太差了 , 跟青葉酒家及大中華的質素差太遠了

污糟到嚇死人的牙簽筒

換洗衣機

家中的西門子洗衣機已用了四年, 但每當脫水時所發出的聲響幾近震耳欲聾, 終於受不了, 昨天請了原廠師傅來維修, 師傅檢查後表示要送回廠維修, 大約要三千元。但他建議我們買一部新機, 因為新機也是差不多價錢, 真是沒有想到這麼嚴重, 有點愕然。付了$470 的維修費, 便與老公到電器店買洗衣機。今次改買了金章洗衣機$3260, 明天可以安排送貨。

今天老公要返工, 只剩我來處理。首先要搬廚房的東西出廳暫放, 更要搬移雪櫃, 好讓洗衣機可以搬出搬入。一切都辦妥, 只候洗衣機送來, 一直等到十二時多, 主角到了, 當工人要搬走舊洗衣機時, 竟然發現洗衣機旁的水龍頭是壞了, 關不到的, 一直在出水。真係晴天霹靂, 馬上關了水掣。工人提醒我盡快找人修理, 因為師傅會在下午來裝機。

我馬上致電相熟的水電師傅, 但他在工作中, 今天肯定來不了。立即上網找水電公司, 找了數家, 終於有一家答應我在二時多前來。此時我正忙着抺地, 忙得不可開交。當我等到三時都未見師傅上門, 致電再追, 在三時半有師傅上來換水龍頭, 盛惠$400 。原來公司的師傅都沒空來換, 結果是老闆(真係幾老, 應該有七十多歲) 親自操刀, 我都算好彩, 最少有人肯來換。

剛剛送走水電師傅, 裝洗衣機的師傅電話到, 半小時內抵達。老天爺替我安排的時間剛剛好, 不幸中之大幸。

福盈酒家

今天要到筲箕灣的城隍廟獻衣包給祖先, 老公很細心, 知道今天要到筲箕灣, 經朋友介紹得知中旅社售賣福盈酒家的套餐, 故此買了作為今晚晚餐。每位$218 包加一, 二人有六個餸, 好抵呀! 未食前, 我沒有抱着很大期望, 但當我試了第一個餸 - 冰鎮鮮鮑魚後, 好味道呀! 每一個餸都十分好味, 我個人認為陳醋骨比較差, 肉比較韌, 其餘每個餸都很好味, 最好味是百花煎釀帶子, 簡直係驚喜。

冰鎮鮮鮑魚

清蒸海上鮮

陳醋焗排骨

馬來咖哩肉蟹

芝士焗海蝦伊麵

百花煎釀帶子

慈山寺之行

在兩個月前已在網上預約參觀慈山寺, 只餘下早上 9:15 的名額, 雖然是較早, 都只好接受喇 ! 入寺是十分嚴格, 門外有專人檢查來人的登記, 限制每天入寺人數, 我是絕對贊成。如不受限制, 淨土都變煩塵。

我與老公參加了十時半的導賞團, 有一女導賞員帶大家遊寺, 細心介紹, 大家都用耳機來聽導賞, 導賞員不用大聲的講解, 現在每人都聽得清楚, 環境依然保持寧靜。12 時便完畢了, 由於早起床早吃早餐, 現在已經肚餓, 但寺內沒有賣食物的地方。幸好寺內在12時左右會免費提供小食給大家, 今天是素义燒飽。我與老公咬了一口後, 大家齊讚好好味, 從未吃過這麼好味的义燒飽, 皮是用種籽及麥來做的, 素义燒比我以前吃過的肉做义燒更美味, 真係食到 lam lam 脷。由於今天遊寺人不多, 義工都請我們多吃幾個, 我與老公各吃了2.5 個, 有一個外國人吃了4個, 太好味了。

曾有親友到過慈山寺享用過熱茶, 大讚好飲, 我們有心想試試。問過義工, 原來 cafe 每天開放時間並不固定的。得知今天可能在14:30 開放, 於是我與老公到了抄經室抄寫心經, 我從來無想過老公會抄經, 我真係好開心, 他抄得比我漂亮, 真估不到。

終於等到 cafe 開了, 每人可以免費享用一件蛋糕及茶, 大家可以隨喜做功德。我要了熟普洱, 老公要咖啡, 我覺得普洱不差, 但沒有驚喜。呷一口芝士蛋糕後, 真係驚嘆如斯好味道, 我倆此生都未試過。原來茶是可以添飲的, 我要了人參烏龍茶, 喝了一啖, 那些人參味在喉嚨內盤旋着, 簡直是享受。以前也飲過台灣的人參烏龍茶, 都沒有這種回甘味道, 我相信李嘉誠先生所提供的都是優質的食物。

坤記手打竹昇麵

在新年前在 HKTVMALL 買了坤記手打竹昇麵 $139 來做新年手信送長輩, 自己也買了一盒來試試。內有三個粗麵 + 三個幼麵 + XO 醬 + 大地魚粉 + 蝦籽粉。兩天前早上我還在睡覺, 媽咪致電來問我啲麵點樣整, 我話盒內有紙教點煮的。媽咪話佢跟足來煮, 難食到死, 無味無道。於是我買了雲吞、菜、鯪魚肉、黑木耳絲及粟米粒, 晚上我用這些材料來煮麵, 並加上大地魚粉及蝦籽粉, 當我食麵時, 嘩 ! 啲麵真係好難食, 無味道, 真係好為難的完成一個麵。

點算好呢? 家中還有四個麵, 如何解決呢? 終於俾我諗到, 今天晚上買蕃茄+鮮蝦做湯底再煮麵, 由於是濃湯底, 味道好多了, 不會覺得難吃。不過, 下次不會再買這麵了。

雞年立春啟示

一年易過，又到立春之日。睇節氣時辰，立春係在陽曆2月3日晚上11時33分，以一般坊間按採用嘅八字計算方法，立春在「夜子」時分來臨，應屬次日（2月4日）計算，如用此法，丁酉年立春嘅八字就是：丁酉年壬寅月壬戌日庚子時。

立春八字有甚麼啟示呢？去年2月4日本欄引述八卦丘之言，推論一番，指丙申猴年立春多火缺水，乾燥得滯，火猛則易燥，恐怕全年易生火爆事件，但火旺可生土，火多又剋金，故此房地產有生機，金融則不敢睇好。

今日睇番轉頭，八卦丘講得冇大錯，香港不幸發生工廈迷你倉大火，令消防員殉職，至到猴年年尾，沙田還發生長命山火，而全年地產旺盛，地價樓價不斷升溫，迫使政府推出新辣招。股市方面，2016全年冇乜升幅，股票得個揸字，除咗職業炒家炒上落市之外，一般散戶搵唔到錢，全靠在猴年農曆十二月，得益於特朗普效應，恒指先至反彈，令全年有滿意進賬。政治上則鬧出港獨、DQ事件，火藥味十足。

去年立春算係批得OK啦。雞年立春又如何？問番八卦丘，佢有如下推論：「雞年立春八字有三水二金一木一火一土。五行齊全，以水為主，壬水乃陽水，江湖之水，有奔蕩之性。但春天木旺，壬水氣弱，須有庚金生水，則生機水源不絕；水有氾濫之性，如亂撞亂撞，易失本性，宜有戊土制之（如城門河兩旁有石土壆防水氾濫），導之入正軌；此外，春天壬水比較冷，凍水無甚生機，最好有太陽照耀，就春江水暖，正晒。咁有冇呢？新年正月一定係寅月，寅內藏丙火甲木戊土，十分啱用，壬戌日之戌為火庫，內有戊土，辛金、丁火，即係話，八字雖然天干無丙戊，但火藏地支，亦相當有力，水唔會凍啦。時辰係庚子時喎，庚金顯露生水，亦正。寅戌內藏戊土，可起堤防之用，令壬水不致出軌。還有一點要注意，丁壬化木，木為壬水之食傷，洩一洩，令呢個八字出生嘅嬰兒將來更加聰明。唔，成盤八字算唔錯。」

廣泛引伸嚟講，雞年水旺，大勢向好，利水行業；水生木，屬木行業有水則靈，水剋火，屬火行業可能低迷一啲；水多洩金，金融業洩氣如濕水炮仗，一啲都唔奇；水被土剋，地產今年不受水旺影響。今年防水災多過防火災，水能載舟，亦能覆舟，不聽民意嘅政治人物，今年要注意嘞。


左丁山