自製麵包 - 失敗

        妹妹買了樂聲的麵包機, 於是我把研究好份量的麥粉、高筋粉、黑糖、鹽、芝麻粉、雞蛋, 交給妹夫, 他替我再加入牛油及酵母， 全部放入麵包機內, 明天早上便有新鮮麵包吃。早上到妹妹家取麵包, 嘩 ! 真係嚇死人, 外皮卜卜脆, 但裏面好似路陷般, 麵包肉全都塌下來。根本不可以用刀來切麵包, 我只能掏出麵包肉來吃, 真攪笑。味道一般啦 ! 憲兒當然話不好吃, 但是我是可以接受到的。其實妹夫弄的麵包(不是用麥粉)是無問題, 我的份量真是要好好研究一下。

        請留意, 雖然麵包不漂亮, 但盛着麵包的康寧碟, 卻是我的至愛, 漂亮極了。這隻碟也是在淘寶買的, 在香港也看不到有這個圖案。

PHD 薄餅博士

        昨天早上沒有買餸, 心血來潮, 很久沒有吃 PIZZA , 於是晚上決定叫 PIZZA 吃。未試過 PHD , 決定試一試。 

        要了一個四人家庭餐, 收到外賣後, 拼盤的樣子也真夠差。老實講, 味道一般, 我覺得 PIZZA HUT 的味道好一點。我吃得一點也不多, 我對這些食物興趣不大, 我都是喜歡中式食物多一點。

        今天早上, 恐怖的事情發生了, 我早上空肚血糖竟然是 9.2, 嚇得我差點叫救命, 整個人心情跌落谷底, 以後都不會光顧這店。

憲兒自己煮早餐

      憲兒點解會咁肥, 是有原因的, 因為他太喜歡吃了。今早自己有點懶, 叫仔仔自己煮早餐, 他弄了一個豐富早餐給自己享用, 真係想唔肥都幾難。

       

灣仔碼頭的鮮蝦雲吞皇10隻 

兩隻煎蛋 + 丘比沙律醬 

一盒香蕉奶 

   

DELIFRANCE 三文治

        中午在尖沙咀吃日式放題, 醫肚後到旺角買 ipad air , 之後便順應憲兒的要求, 到了尖沙咀 THE ONE 看電影-金雞, 然後在尖沙咀到處逛逛。

         晚上我已無胃口吃晚餐, 我提議到 DELIFRANCE 吃三文治, 其實我好像未試過吃這家餐廳的。我要了一個三文魚麥包三文治, 賣相已令我十分失望, 味道令我更失望, 不會再光顧。老公及兒子都要了濃湯海鮮意粉, 他們說很好味。

trade in ipad 2

        得知 ipad 2 將要停產, 家中的 ipad 2 已用了兩年半, 我想快點把它 trade in , 然後換 ipad air 。因為豐澤的三年保養快到期, 如果不幸壞了, 維修費肯定不菲, 倒不如趁它還值一點錢, 來換一部新機。
        上次老公要買 3G版+WIFI 版的 32GB ipad 2, 十分昂貴, 事實證明只需用最基本的 wifi 版 16GB 便已足夠, 因為我們都不帶機出街的, 也不會 download 影片。
        到了旺角衛訊買 16GB WIFI 版 白色的 ipad air $3888 , trade in ipad 2 只有$1500 , 原來 ipad 2 有兩隻角凹了, 由原本可有的$1800 , 扣了$300 , 只有$1500 。另外買了一個紅色皮機套 $150 , 可以打直打橫來看 ipad air , 十分方便好看實用。其實算起來實際只需付 $2538 , 便有新機用, 不錯。 
        

逸東酒店日式放題

        憲兒月尾生日, 24孝的老豆要替愛兒慶祝, 因為下兩星期都不是在星期六日放假, 決定今天帶他吃日式放題。兩天前買了團購 - 逸東酒店日本餐廳日式放題午餐, 任食 2 小時, $188 。
        全部食物只有三張紙, 相比漁屋十多張紙, 真是差太遠。少食物種類也不是問題, 最緊要是好味, 但實在太令人失望, 三文魚無厘味道, 一點鮮味也沒有。
     

福善會龍躉兩味

       晚上專誠來福善會吃晚飯, 經理介紹龍躉兩味$168, 老公話試一試。我們再叫了最好味的梅醬骨 $58, 沙嗲金菇肉片煲 $58, 不用加一的, 真是十分抵食 , 最難得是又大碟又好味又抵食。 這個龍躉兩味, 真是要擊節讚賞, 好味到無得頂, 尤以蒸骨腩為甚, 憲兒說好好味呀, 下次要再來吃。

你自己要小心啲啦 !

藝人劉嘉玲、梁家輝等日前於北京出席英皇電影《北京愛情故事》首映，嘉玲分享與老公梁朝偉的溫馨時刻時說：「每次我出門，佢都會講句『自己小心啲』，簡單一句話已經令人好溫暖。」大讚老公窩心。而該片將於情人節在內地上映。  


    我很感恩, 我比劉嘉玲幸福多了。因為兒子每天上學或外出, 每當他要離家外出, 又或是我要離家外出,他都必定跟我說 : 『媽咪, 你自己要小心啲呀, 如果有咩事就打電話俾我或爸爸。』我都必定跟他說:『傻仔, 媽咪會有啲咩事呀, 你記住上堂要俾心機呀!』每次送他出門口都要溫馨一番的, 真是心都甜晒。 

自己煮的海參冬菇排骨

        我買了海參, 媽咪幫我發。今晚決定炆一碟海參冬菇排骨, 這一碟真是大碟頭, 味道方面, 一般啦 ! 還有進步的空間 。憲兒說很好味呀 ! 不過製作過程需時, 真係少啲耐性都唔得。 

帝京酒店帝京軒午飯

        經過數天的努力, 終於在昨天 set 好手機, 趕在今天要交給友人, 因為今天是在衛訊 trade in 手機的最後限期。今天11時左右我倆便到衛訊放下 iphone 4 , 讓店員檢查清楚, 確認無問題後, 便收到 $1530, 便送走了好友已用了兩年的 iphone 。
        好友為了答謝我, 請我到帝京酒店帝京軒午飯, 我倆點了一個點心套餐, 每位 $168 , 未計茶芥加一。我覺得賣相是很有心思的, 食物的組合也有創意, 味道方面是中規中矩, 沒有驚喜。但我們選擇這店是因為環境十分寧靜及舒服, 不會像富臨、海港般嘈吵, 我才可以化身為手機老師, 慢慢的介紹 HTC ONE MAX 的各項功能給好友, 教她使用 Andriod 手機。我足足講了數小時, 口水都乾, 其實仍未講完呢 ! 好友最高興是螢幕大了, 看東西清楚了很多, 而且螢幕色彩比 iphone 漂亮多了。還有我替好過了近 600 首歌在手機內, 她可以慢慢享受了。

陪朋友買 HTC ONE MAX

        今天我的好友終於等到有空了, 她可以請半天假, 我便帶她到旺角買手機, 她選了 HTC ONE MAX $5898 , 跟我一樣, 我選了紅色, 她選了金色, 同樣有送 HTC 的粉紅色機套。但是 trade in iphone 4 的價錢就由上次(20/1)問的 $2500 , 降至今天只有 $1530 , 真係嚇死人, 足足少了接近 $1000 。
        買了手機後, 我們到柏裕中心14樓的服務中心辦理舊機資料過新機的手續。完成後, 我便把她的新手機帶回家, 因為我要替她 set 手機, 加入啱佢用的 apps 及過一些歌曲給她。
         

年初三 . 漁屋日式放題

        難得老公今年年初三放假, 他終於可以跟我們一起去他舅母家中拜年, 他已經有十多年無來舅母家中拜年了。拜年完後, 一行九人到附近酒樓吃午飯。
        吃完飯後, 坐港鐵到尖沙咀逛逛, 並到了 Pacific Coffee 飲嘢傾偈, 其實大家都在捱時間。不過我今天的心情真係麻麻地, 昨晚夢見老爺, 已經在想應何時去燒衣包給他呢? 另外, 今天穿錯了少穿的 converse 帆布鞋, 我的腳趾應該刮傷了, 隻腳痛得要命。最要命是胃痛, 我平時都無胃痛, 今天竟然會胃痛, 真係激死我。
         老公的大佬請食飯, 在尖沙咀漁屋買了團購, 5:30pm 便開始食日式放題。由 5:30pm 可以食到 8:00pm, 款式十分多, 任點任食, 三文魚是挪威的, 老公最喜歡並大讚。憲兒當然是不停的吃, 他最愛吃刺身及壽司。可惜我真是無福消受, 其實想吃熱嘢多過想吃生冷嘢。

團購價 : $149 
服務費 : $  44.7
額外費(新年) : $30
每人共需 :  $223.7

老爺報夢要錢呀

        昨晚(年初二晚)的氣溫也很高, 我在日間只是穿一件衫, 但很奇怪, 晚上要睡覺時, 雙腳很凍, 感覺是凍到上小腿, 我要不停把兩腳互相磨擦, 才勉強覺得好一點, 我想起床去取襪子來穿, 但人懶, 不想動, 便算了。
        半夜四時紥起來, 我夢見老爺要錢呀, 我馬上推醒老公告訴他。其實我平常發的夢, 我大部份都記不起, 只有少部份是記得清清楚楚, 這是其中一個夢。
        我在夢中見到老爺在我家(新居)中, 但他如何來到我家的夢境, 我就記不起。我見到他站在電視機前, 憲兒是小學模樣睡在梳化上, 我在旁邊陪着他, 憲兒突然紥起來, 指着爺爺說 : 『你唔係打橫瞓咩? 點解你會棟篤企係度? 』然後他便繼續睡在梳化上, 爺爺也沒有答他。
         鏡頭一轉, 我要送憲兒上學去, 回到家中, 見不到老爺, 我想他應該是走了。怎料我推開憲兒睡房門時, 見到老爺躺在憲兒房內地下睡, 腰是靠着衣櫃, 我沒有驚動他。我覺得個頭很骯髒, 正要到廁所洗頭, 正在此時, 老爺走出房, 叫我的名字並跟我說:  『我都要錢養老呀! 』我在夢中想, 你都死了, 要錢來做什麼。然後他又跟我說 : 『你打電話俾(我老公), 叫佢check 下啲股票價錢。』我心想你想買定想賣呀。我馬上跟老爺說 : 『我可以用電話幫你 check 股票。』此時, 我老公的姐夫出現在我對面, 他做表情示意叫我不要替他 check , 他並笑着說 : 『check 唔到呀! check 唔到呀! 』老爺此時把頭哄過來說 : 『點解 check 唔到』我馬上跟老爺說 : 『check 到呀』並把手機的股票價格顯示給他看, 正是 2628 中國人壽, 價格好像是 $17.51 或是 $19.51 。此時我便醒了, 真係清楚到不得了。        
        其實我在拜老爺時, 我都有燒衣包給他的, 可能他覺得唔夠啦! 

年初二 . 睇大鬧天宮

        年初二不用出外拜年, 決定帶外甥仔去睇戲。老公唔肯一齊去睇戲, 佢話 3D 電影會睇到頭暈, 點都唔去。所以只有我, 憲兒與外甥去睇, 原來今次最醒係老公。這套大鬧天宮睇到我眼瞓, 原來憲兒都覺得眼瞓, 好彩啫, 如果唔係寶貝一定笑我年紀大啦 ! 但外甥仔十分精神並說好好睇, 我與憲兒覺得麻麻地, 常常打來打去, 飛來飛去, 不知幾想合起眼睛睡一睡。10 : 45  睇到 12:45 , 我帶他們到厚福街吃午飯。妹妹一家出來尖沙咀接仔仔行街, 我與憲兒便馬上回家休息, 唔係講笑, 我們兩個倒頭便睡了。